மியான்மரை தாக்கிய பூகம்பம் உலகத்தையே கவலையில் ஆழ்த்தி உள்ளது. நேற்று பகலில் 7.7 ரிக்டர் அளவில் சக்தி வாய்ந்த நிலநடுக்கம் ஏற்பட்டது. அடுத்த 12 நிமிடங்களில் 6.9 ரிக்டர் அளவில் இன்னொரு பூகம்பமும் மியான்மரை தாக்கியது. அடுத்தடுத்து வந்த பூகம்பத்தால் மாண்டலே நகரில் கட்டடங்கள் சரிந்து விழுந்தன. கொத்து கொத்தாக மக்கள் மரணம் அடைந்தனர். இதுவரை 1003 பேர் இறந்துள்ளனர். இன்னும் 2,300 பேர் காயங்களுடன் சிகிச்சை பெறுகின்றனர். பலரை காணவில்லை. பலி எண்ணிக்கை 10 ஆயிரம் வரை உயரக்கூடும் என்று அமெரிக்க விஞ்ஞானிகள் அதிர்ச்சியை கிளப்பி உள்ளனர். மியான்மரை தாக்கிய பூகம்பம் தாய்லாந்து தலைநகர் பாங்காக்கிலும் உணரப்பட்டது. அங்கு கட்டுமான வேலை நடந்து கொண்டிருந்த போது 33 மாடி கட்டடம் இடிந்து விழுந்தது. 10 தொழிலாளர்கள் இறந்தனர். 100 பேர் மாயமானார்கள்.