தெலுங்கில் 32 கோடி வசூல் : மொத்தத்தில் 300 கோடி வசூல்?

ரஜினிகாந்த் கதாநாயகனாக நடிக்க மோகன்லால், சிவராஜ்குமார், ஜாக்கி ஷெராப், சுனில் சிறப்புத் தோற்றத்தில் நடிக்க கடந்த வாரம் வெளியான படம் 'ஜெயிலர்'. இப்படம் உலகம் முழுவதும் நல்ல வரவேற்புடன் ஓடிக் கொண்டிருக்கிறது.

தெலுங்கில் எதிர்பார்த்ததை விடவும் இப்படம் நல்ல வசூலைப் பெற்று வருகிறது என டோலிவுட் வட்டாரங்கள் தெரிவிக்கின்றன. சிரஞ்சீவி நடித்து வெளிவந்த 'போலா ஷங்கர்' இப்படத்திற்குப் போட்டியாக இருக்கும் என்று எதிர்பார்க்கப்பட்ட நிலையில் 'போலா ஷங்கர்' படுதோல்வியடைந்துள்ளது. அதனால், 'ஜெயிலர்' படத்திற்கு கூடுதல் தியேட்டர்களும், ரசிகர்களின் வருகையும் கிடைத்து வருகிறது.

கடந்த நான்கு நாட்களில் இப்படம் ஆந்திரா, தெலங்கானா ஆகிய மாநிலங்களில் மட்டும் 32 கோடி வசூலைப் பெற்றுள்ளது என்பதை அங்கு படத்தை வெளியிட்ட ஏசியன் சினிமாஸ் நிறுவனம் அதிகாரப்பூர்வமாக அறிவித்துள்ளது. உலக அளவில் கடந்த நான்கு நாட்களில் இப்படம் 300 கோடி வசூலைக் கடந்துள்ளதாகச் சொல்கிறார்கள். மற்ற வினியோகஸ்தர்கள் வசூல் தொகையை அறிவித்து வரும் நிலையில் படத்தைத் தயாரித்தவர்கள் இதுவரையிலும் வசூல் பற்றி அதிகாரப்பூர்வமாக எதையும் அறிவிக்கவில்லை.