11 ஆண்டுகளுக்குப் பிறகு திரைக்கு வரும் விஷால் படம்

மார்க் ஆண்டனி, ரத்னம் படங்களை அடுத்து துப்பறிவாளன்- 2 படத்தை இயக்கி, நடிக்கும் முயற்சியில் ஈடுபட்டுள்ளார் நடிகர் விஷால். இந்த நிலையில் கடந்த 2013ம் ஆண்டு சுந்தர். சி இயக்கத்தில் விஷால் நடித்து கிடப்பில் கிடந்த மத கஜ ராஜா என்ற படம் திரைக்கு வரப்போவதாக தகவல் வெளியாகி உள்ளது. இப்படத்தில் விஷாலுடன் அஞ்சலி, வரலட்சுமி, சந்தானம், சடகோபன் ரமேஷ் உள்ளிட்ட பலரும் முக்கிய வேடங்களில் நடிக்க, விஜய் ஆண்டனி இசை அமைத்திருந்தார். நிதி நெருக்கடி காரணமாக இப்படம் திரைக்கு வராமல் கடந்த 11 ஆண்டுகளாக கிடப்பில் போடப்பட்டிருந்தது. இந்த நிலையில் சமீபத்தில் சுந்தர். சி இயக்கி வெளியான அரண்மனை 4 படம் திரைக்கு வந்து வெற்றி பெற்ற நிலையில், தற்போது இந்த மத கஜ ராஜா படத்தை வெளியிடும் வேலைகள் நடைபெற்று வருகிறதாம். விரைவில் இப்படத்தின் ரிலீஸ் தேதி வெளியாக வாய்ப்புள்ளது.