'ரெட்ரோ' ருக்கு - வாழ்த்தியவர்களுக்கு பூஜா ஹெக்டே நன்றி

கார்த்திக் சுப்பராஜ் இயக்கத்தில், சூர்யா, பூஜா ஹெக்டே மற்றும் பலர் நடிப்பில் கடந்த வாரம் வெளியான படம் 'ரெட்ரோ'. 90களில் நடக்கும் கதை இடம் பெற்ற இப்படத்தில் கால்நடை மருத்துவர் 'ருக்கு' என்ற கதாபாத்திரத்தில் பூஜா ஹெக்டே நடித்திருந்தார். அந்தக் கால குடும்பப் பாங்கான தமிழ்ப் பெண்ணாக அவர் நடித்த கதாபாத்திரமும், அவரது எளிமையான தோற்றமும் பல ரசிகர்களைக் கவர்ந்தது.

இருந்தாலும் சில தெலுங்கு ஊடகங்கள் மட்டும் பூஜாவை கடுமையாக விமர்சித்தது. அவரது தொடர் தோல்விப் படங்களில் இதுவும் என்று எழுதியது. இதற்குப் பின்னால் வேறு சில நடிகைகளின் மேனேஜர்கள் இருந்ததாக பூஜாவின் ரசிகர்கள் சமூக வலைத்தளங்களில் குற்றம் சாட்டினர்.

இதனிடையே, இப்படத்தில் தன்னுடைய ருக்கு கதாபாத்திரத்திற்குக் கிடைத்த வரவேற்பு குறித்து பூஜா நன்றி தெரிவித்து, “நன்றியுணர்வு பதிவு - ருக்குவாக நான் நடித்ததற்கு எனக்கு அன்பையும், பாராட்டையும் தெரிவித்த அனைவருக்கும் ஒரு சிறப்பு நன்றி. இது மிகப் பெரிய வரவேற்பைப் பெற்றுள்ளது. தனிப்பட்ட செய்திகளுக்கும் நன்றி. அவர்களின் அழகான பதிவுகளுக்கு என் ரசிகர்களுக்கு நன்றி. மற்றும் அனைத்து 'கனிமா' ரீல்களுக்கும் நன்றி. அன்பு மற்றும் அன்பு மட்டுமே இதற்கான பதில்,” என நெகிழ்ச்சியுடன் பதிவிட்டுள்ளார்.