தமிழில் ரீமேக் ஆகும் கன்னட படம் 'சூ ப்ரம் சோ'

சமீபகாலமாக சிறிய பட்ஜெட்டில் உருவாகும் கன்னட படங்கள் பெரிய கவனத்தை ஈர்த்துள்ளது. அந்த வரிசையில் தற்போது வெளிவந்து கல்லா கட்டிக் கொண்டிருக்கும் படம் 'சூ ப்ரம் சோ'. சுமார் 6 கோடி ரூபாய் பட்ஜெட்டில் உருவாகி உள்ள இந்த படம் 100 கோடிக்கு மேல் வசூலித்து சாதனை படைத்துள்ளது.

கன்னட நடிகரும் இயக்குநருமான ராஜ் பி ஷெட்டி, ஷனீல் கவுதம், சந்தியா, பிரகாஷ் துமினாட் நடித்துள்ளனர். ஜே.பி.துமினாடு இயக்கியுள்ளார். ஒரு கிராமத்துக்குள் நடக்கும் அமானுஷ்யமான சம்பவங்களை மையமாக வைத்து காமெடியாக படம் உருவாகியுள்ளது.

இந்நிலையில் இந்தப் படம் தமிழில் ரீமேக் ஆக இருக்கிறது. பிரபல விநியோகஸ்தர் என்.எஸ் ராஜ்குமார் இதன் தமிழ் ரீமேக் உரிமையைப் பெற்றுள்ளார். படத்தின் நாயகனாக விஜய் சேதுபதியை நடிக்க வைக்க முயற்சிகள் மேற்கொள்ளப்பட்டு வருகிறது. கன்னட படத்தை இயக்கிய ஜே.பி.துமினாட்டே இதனை இயக்குவார் என்று தெரிகிறது.