சுமாரான வரவேற்பில் அனுஷ்காவின் 'காட்டி'

அனுஷ்கா, விக்ரம் பிரபு மற்றும் பலர் நடிக்க கிரிஷ் இயக்கத்தில் நேற்று வெளியான தெலுங்குப் படம் 'காட்டி'. இப்படத்தைத் தமிழிலும் டப்பிங் செய்து வெளியிட்டுள்ளனர். ஆனால், இங்கு படம் ஓடுவதைப் பற்றி படக்குழு கவலைப்படவில்லை. எந்த ஒரு பத்திரிகையாளர் சந்திப்பும், காட்சியையும் நடத்தவில்லை. ஒரு சில யு டியூப் சேனல்கள் பேட்டிகளுடன் நிறுத்திவிட்டார்கள்.

தமிழ் ரசிகர்களிடம் பிரபலமான அனுஷ்கா, தமிழ் நடிகரான விக்ரம் பிரபு நடித்திருந்தும் இப்படத்தை ரசிகர்களிடம் கொண்டு போய் சேர்க்க அவர்கள் முயலவில்லை. இதனிடையே, தெலுங்கில் பெரிய அளவில் போகும் என்று எதிர்பார்க்கப்பட்ட இந்தப் படம் அங்கு சுமாரான வரவேற்பையே பெற்றுள்ளது. படம் வெளியான இரண்டாவது நாளான இன்று எந்த ஒரு தியேட்டரிலும் ஹவுஸ்புல் ஆகவில்லை. பல தியேட்டர்களில் 25 சதவீத அளவில்தான் டிக்கெட்டுகள் முன்பதிவு செய்யப்பட்டுள்ளன.

படத்திற்கான விமர்சனங்களும் குறைகளைத்தான் அதிகம் சொல்லி வந்திருக்கிறது. இந்தப் படம் மீது பெரிய எதிர்பார்ப்பு வைத்திருந்த இயக்குனர் கிரிஷ், அனுஷ்கா, தெலுங்கு அறிமுகம் சிறப்பாக இருக்கும் என எதிர்பார்த்த விக்ரம் பிரபு ஆகியோருக்கு இப்படம் ஏமாற்றத்தையே தந்துள்ளது.