என் அப்பா இன்ஸ்டாகிராமில் இருக்கிறாரா? : கல்யாணி பிரியதர்ஷன் ஆச்சர்யம்

பிரபல இயக்குனர் பிரியதர்ஷன் மற்றும் நடிகை லிசி தம்பதியின் மகள் கல்யாணி பிரியதர்ஷன் மலையாளம், தமிழ், தெலுங்கு உள்ளிட்ட மூன்று மொழிகளிலும் பிசியான நடிகையாக நடித்து வருகிறார். சமீபத்தில் அவர் நடிப்பில் வெளியான லோகா சாப்டர் 1 ; சந்திரா மிகப்பெரிய வெற்றியை பெற்றது. இந்த நிலையில் பிரியதர்ஷினின் மிக நெருங்கிய நண்பரான நடிகர் மோகன்லாலின் மகள் விஸ்மாயாவும் தொடக்கம் என்கிற படத்தின் மூலம் கதாநாயகியாக அறிமுகமாகிறார். இதுகுறித்த மகிழ்ச்சியை இயக்குனர் பிரியதர்ஷன், சிறு வயதில் விஸ்மாயாயா மற்றும் கல்யாணி இருவரும் சிறு குழந்தைகளாக இருந்தபோது எடுக்கப்பட்டிருந்த புகைப்படத்தை தனது இன்ஸ்டாகிராம் பக்கத்தில் பகிர்ந்து கொண்டுள்ளார்.

மேலும், “இந்த இரண்டு குழந்தைகளையும் என் கைகளில் தூக்கி வளர்த்திருக்கிறேன். அந்த அளவிற்கு நாங்கள் ஒரே குடும்பமாக இருந்தோம். மோகன்லால் சொன்னது போல நாங்கள் சினிமாவில் நுழைவோம் என்று நினைத்ததில்லை. கல்யாணியும் மிக சிறந்த ஆரம்பத்தை பெற்றுள்ளார். அதேபோல மாயாவின் முதல் படமும் அழகான ஒன்றாக அமையும். கடவுள் உன்னை ஆசிர்வதிக்கட்டும் மாயா” என்று குறிப்பிட்டு இருந்தார்.

தந்தையின் தனது இந்த இன்ஸ்டாகிராம் போஸ்டை தனது சோசியல் மீடியா பக்கத்தில் பகிர்ந்து கொண்டுள்ள கல்யாணி, தன் பங்கிற்கு விஸ்மாயாவுக்கு தனது வாழ்த்துக்களை தெரிவித்துள்ளார். அது மட்டுமல்ல இந்த பதிவை பார்க்கும் வரை என் அப்பாவுக்கு இன்ஸ்டாகிராமில் கணக்கு இருக்கிறது என்பதே எனக்கு தெரியாது என்று ஒரு உண்மையையும் ஜாலியாக வெளிப்படுத்தியுள்ளார் கல்யாணி பிரியதர்ஷன்.