ராமராஜனை சந்தித்த நடிகை கனகா

1989ம் ஆண்டில் கங்கை அமரன் இயக்கத்தில் ராமராஜன், கனகா இணைந்து நடித்த படம் கரகாட்டக்காரன். இதில் தான் கனகா அறிமுகமானார். இப்படம் ஓராண்டுக்கு மேல் ஓடி மிகப் பெரிய வசூல் சாதனை செய்தது. இந்த படத்திற்கு பிறகு தங்கமான ராசா, சீதா, பெரிய இடத்துப் பிள்ளை, அதிசய பிறவி, கும்பக்கரை தங்கையா, சாமுண்டி என பல படங்களில் நடித்த கனகா கடைசியாக 1998 கே.எஸ்.அதியமான் நடித்த தலைமுறை என்ற படத்தில் நடித்திருந்தார். தனது தாயாரான நடிகை தேவிகாவின் மரணத்திற்கு பிறகு சென்னை அடையாறில் உள்ள தனது வீட்டில் வசித்து வந்தார். சில மாதங்களுக்கு முன்பு நடிகை குட்டி பத்மினி கனகாவை தான் சந்தித்த புகைப்படங்களை வெளியிட்டு இருந்தார். இந்த நிலையில் தற்போது தனது முதல் பட நாயகனான ராமராஜனை அவரது வீட்டில் சந்தித்து நலம் விசாரித்துள்ளார் கனகா. அப்போது அவர்கள் எடுத்துக்கொண்ட புகைப்படம் வெளியாகியுள்ளது. அதில், கனகா ஆள் அடையாளமே தெரியாத அளவுக்கு மாறிப்போய் இருக்கிறார்.