கணவருடன் முற்றிய பிரச்னை ; நடிப்பில் களம் இறங்கிய நடிகர் கோவிந்தாவின் மனைவி

பாலிவுட் நடிகர் கோவிந்தா கிட்டத்தட்ட 40 வருடங்களுக்கு மேலாக தனக்கென ஒரு குடும்பப்பாங்கான காமெடி பாதையை தேர்ந்தெடுத்து யாருடனும் போட்டி போடாமல் படங்களில் நடித்து வருகிறார். 1987ல் சுனிதா என்பவரை காதலித்து திருமணம் செய்து கொண்டார். இந்த நிலையில் கடந்த 2025ல் இவர்கள் இருவருக்கும் இடையே ஏற்பட்ட கருத்து வேறுபாடு காரணமாக சுனிதா கோவிந்தாவிடம் இருந்து பிரிந்து வாழ்வதற்காக விவாகரத்திற்கு விண்ணப்பித்துள்ளார் என்ற செய்தி வெளியானது. அதற்கு ஏற்றவாறு நடிகர் கோவிந்தாவும் வேறு ஒரு வீட்டில் தற்போது வசித்து வருகிறார்.

இந்த நிலையில் தற்போது கோவிந்தாவுடன் நடித்துவரும் இளம் நடிகை கோமல் என்பவரை கோவிந்தா உடன் தொடர்புபடுத்தி குற்றம் சாட்டி வருகிறார் அவரது மனைவி சுனிதா. இது ஒரு பக்கம் இருக்க தானும் திரையுலகில் நடிகையாக அடி எடுத்து வைக்க முடிவு செய்துள்ள சுனிதா தற்போது படம் ஒன்றில் நடிக்க ஒப்பந்தமாகியுள்ளார்.

பொதுவாகவே சுனிதாவின் இந்த குற்றச்சாட்டுகளை பெரிதாக எடுத்துக் கொள்ளாத நடிகர் கோவிந்தா, சுனிதாவின் இந்த சினிமா என்ட்ரி பற்றி கூறும்போது, “உண்மையிலேயே ரொம்ப நல்லது. இப்படி வீட்டில் அமர்ந்து கொண்டிருந்தால் தேவையில்லாமல் அவர் பல பேட்டிகளை தான் கொடுத்துக் கொண்டிருப்பார்” என்று கிண்டலாக பதில் அளித்துள்ளார்.