50வது நாளில் 'சிறை'
ADDED : 20 minutes ago
அறிமுக இயக்குனர் சுரேஷ் ராஜகுமாரி இயக்கத்தில், ஜஸ்டின் பிரபாகரன் இசையில், விக்ரம் பிரபு, அறிமுக நாயகன் எல்கே அக்ஷய்குமார், அறிமுக நாயகி அனிஷ்மா அனில்குமார் மற்றும் பலர் நடிப்பில் கடந்த 2025ம் வருடம் டிசம்பர் 25ம் தேதி வெளியான படம் 'சிறை'.
விக்ரம் பிரபுவின் 25வது படமாக வெளிவந்த இந்தப் படம் விமர்சன ரீதியாகவும், வசூல் ரீதியாகவும் நல்ல வரவேற்பைப் பெற்றது. சுமார் 10 கோடி ரூபாய் செலவில் தயாரிக்கப்பட்டதாகச் சொல்லப்படும் படம், 30 கோடி வசூலைக் கடந்து இன்னமும் ஓடிக் கொண்டிருக்கிறது.
இன்றுடன் இப்படம் வெளிவந்து 50 நாட்களாகிறது. இந்தக் காலத்தில் ஒரு படம் நான்கைந்து நாட்கள் தாக்குப் பிடித்து ஓடுவது பெரிய விஷயமாக உள்ளது. இரண்டாவது வாரம் போஸ்டர் அடிப்பது கூட சில படங்களுக்குத்தான் நடக்கிறது. சில படங்கள் மட்டுமே அபூர்வமாய் 25 நாட்களைக் கடக்கிறது. அப்படியிருக்கையில் இப்படம் 50 நாட்களைக் கடந்து ஓடுவது குறிப்பிட வேண்டிய ஒன்று.
சென்ற ஆண்டில் வெளியான சிறிய படங்களில் 'டூரிஸ்ட் பேமிலி, மாமன்,' உள்ளிட்ட சிறிய படங்கள் 50 நாள் போஸ்டரை வெளியிட்டன. அந்த வரிசையில் வருடக் கடைசியில் வெளிவந்த 'சிறை' படமும் சேர்ந்துள்ளது.