பாடகர் ஆன புகழ் : பிளாஷ்பேக் சொல்லி பீலிங்

லட்சுமி மூவி மேக்கர்ஸ் தயாரிக்க, சஜோ சுந்தர் முருகேசன் இயக்கும் 4 இடியட்ஸ் படத்தில் புகழ், நயன் நடிக்கிறார்கள். சுபாஷ் முனிரத்னம் இசையமைக்கும் இந்த படத்தில் பாடியிருக்கிறார் ஹீரோ புகழ். சென்னையில் நடந்த பாடல் வெளியீட்டு விழாவில் பேசிய ரவிமரியா இது திரில்லர், காமெடி கலந்த கதை. இந்த படக்கம்பெனி மீண்டும் படம் தயாரிப்பது மகிழ்ச்சி என்றார்.

ஹீரோ புகழ் பேசுகையில், சென்னை வடபழனி ஏரியாவில் டூ வீலர், கார் வாட்டர் வாஷ் கம்பெனியில் வேலை பார்த்தேன். என் கெட் அப், கேரக்டர் பார்த்து ஒரு நண்பர் நீங்க நடிக்கலாம் என்றார். விஜய் டிவியில் வாய்ப்பு வாங்கி கொடுத்தார். அதிலிருந்து முன்னேறி சினிமாவில் காமெடியனாக நடித்து, இப்ப ஹீரோ ஆகிவிட்டேன். இந்த படத்தில் ஒரு பாடலும் பாடி இருக்கிறேன். பல வெற்றி படங்களுக்கு ஒளிப்பதிவு செய்த யு.கே செந்தில்குமார் 4 இடியட் படத்துக்கு ஒளிப்பதிவு செய்து இருக்கிறார். அவர் மட்டுமே ஹீரோயின் பிரயாக் நயனிடம் நன்றாக பேசுவார். காரணம் எனக்கு இங்கிலீஷ் தெரியாது. ஹீரோயினுக்கு தமிழ் தெரியாது. முதன் முறையாக என் அம்மா, மனைவி , குடும்பத்தினரை இந்த விழாவுக்கு அழைத்து வந்துள்ளேன். பல ஊர்களில் இருந்து என் ரசிகர்களும் வந்துள்ளனர் என்றார்.