ரஜினி, கமல் படத்தை பிலிம் ரோலில் படமாக்கும் நெல்சன்

கிட்டத்தட்ட 47 வருடங்களுக்கு பிறகு ரஜினிகாந்த், கமல்ஹாசன் இருவரும் இணைந்து நடிக்கும் படம் தற்போது உருவாகிறது. 'ஜெயிலர்' படத்தின் இரண்டு பாகங்களைத் தொடர்ந்து நெல்சன் திலீப்குமார் இந்த படத்தை இயக்குகிறார், இதன்மூலம் ரஜினியை வைத்து தொடர்ந்து மூன்று படங்களை இயக்கும் இயக்குனர் என்கிற பெருமையையும் நெல்சன் பெற்றுள்ளார். அது மட்டுமல்ல இந்த படத்தில் மீண்டும் ஒரு புதுமையை செய்ய இருக்கிறாராம் நெல்சன்.

அதாவது கடந்த பத்து வருடங்களுக்கு மேலாக சினிமா டிஜிட்டலுக்கு மாறிவிட்டது. அனேகமாக கடைசியாக பிலிம் ரோலில் தமிழில் வெளியான படம் 'தனி ஒருவன்' என்று தான் சொல்லப்படுகிறது. இந்த நிலையில் தற்போது மீண்டும் பிலிம் ரோலை பயன்படுத்தி ரஜினி, கமல் இருவரும் நடிக்கும் படத்தை இயக்குவதற்கு நெல்சன் திட்டமிட்டுள்ளதாக ஒரு தகவல் வெளியாகி உள்ளது. இதற்கு ரஜினி, கமல் இருவருமே கிரீன் சிக்னல் கொடுத்து விட்டதாகவும் சொல்லப்படுகிறது.