தொண்டாமுத்தூர் மாரியம்மன் கோவிலில் தீர்த்தக்குடம் வழிபாடு

தொண்டாமுத்தூர்:  தொண்டாமுத்தூரில் உள்ள மாரியம்மன் கோவிலில், தீர்த்தக்குடம் வழிபாடு திருவிழா நடந்தது.

தொண்டாமுத்தூரில் உள்ள மாரியம்மன் கோவில், 300 ஆண்டுகள் பழமை வாய்ந்தது. இக்கோவிலில் ஆண்டுதோறும் தை மாதம் தீர்த்தக்குட வழிபாடு நடக்கும். ஐந்தாமாண்டு தீர்த்தக்குட வழிபாடு திருவிழா நடந்தது. காலை, 8:00 மணிக்கு, வஞ்சியம்மன் கோவில் வீதியில் உள்ள குள்ளம்மன் கோவிலில், விநாயகர் வழிபாடு, புனிதநீர் வழிபாடு, விழா அனுமதி பெறுதல் நடந்தது. காலை, 8:30 மணிக்கு குள்ளம்மன் கோவிலில் இருந்து தீர்த்தக்குடங்கள் புறப்பட்டது.

இதில் சுற்றுவட்டாரத்தில் உள்ள கிராம மக்கள், தீர்த்தக் குடங்களுடன் மங்கல வாத்தியங்கள் முழங்க ஊர்வலமாக வந்தனர். தீர்த்தக்குட ஊர்வலம், குள்ளம்மன் கோவிலில் இருந்து, நரசிபுரம் ரோடு, மாதம்பட்டி ரோடு, காமாட்சியம்மன் கோவில் வீதி வழியாக, காலை, 11:30 மணிக்கு மாரியம்மன் கோவிலை அடைந்தது. அதன்பின், மாரியம்மனுக்கு தீர்த்தக்குடங்களால் பெருந்திருமஞ்சனம் நடந்தது. பகல், 12:00 மணிக்கு சிறப்பு அலங்கார ஆராதனை நடந்தது. மாலை, 6:00 மணிக்கு அம்மன் திருவீதி உலா நடந்தது. இந்நிகழ்ச்சியில், சுற்றுவட்டார கிராமங்களில் இருந்து ஆயிரக்கணக்கான பக்தர்கள் கலந்து கொண்டனர்.