காளியம்மன் கோவில் கும்பாபிஷேக விழா

சேலம்: சேலம், சஞ்சீவிராயன்பேட்டை காளியம்மன் கோவில் கும்பாபிஷேக விழா இன்று நடக்கிறது. சேலம், சஞ்சீவிராயன் பேட்டையில் உள்ள காளியம்மன் கோவில் கும்பாபிஷேக விழாவை முன்னிட்டு கணபதி பூஜை, வாஸ்து சாந்தி, பூர்ணாஹூதி உள்ளிட்ட நிகழ்ச்சிகள் நடந்தன. நேற்று விஸேஷசந்தி, கணபதி பூஜை, புண்யாஹவசனம், சிவசூர்ய பூஜை, த்வார, தோரண பூஜைகள் நடந்தன. யாகசாலை பூஜைகள் மருதாசல அடிகளார், சாந்தலிங்க ராமசாமி அடிகளார் அருளாசியுடன் நடந்தது. இன்று காலை விநாயகர் பூஜையுடன் கும்பாபிஷேக நிகழ்ச்சி துவங்குகிறது. காலை 10.30 மணிக்குள் காளியம்மன் மற்றும் பரிவார தெய்வங்களுக்கும், கோபுரங்களுக்கும் கும்பாபிஷேகம் நடக்கிறது.கும்பாபிஷேக விழாவில், புதுச்சேரி மாநில முதல்வர் ரங்கசாமி கலந்து கொள்கிறார். விழாவில் கலந்து கொள்ளும் பக்தர்களுக்கு அன்னதானம் வழங்கப்படுகிறது. இரவு 9 மணிக்கு காளியம்மன் சிறப்பு அலங்காரத்தில் புஷ்ப பல்லாக்கில் திருவீதி உலா நடக்கிறது.