செப்பறை அழகிய கூத்தர் கோயிலில் மகா கும்பாபிஷேகம் கோலாகலம்

நெல்லை : உலகின் முதல் நடராஜர் திருமேனி அமையப்பெற்ற நெல்லை மாவட்டம் ராஜவல்லிபுரம் செப்பறை அழகிய கூத்தர் கோயிலில் மகா கும்பாபிஷேகம் கோலாகலமாக நடைபெற்றது.

திருநெல்வேலி மாவட்டம் ராஜவல்லிபுரம் தாமிரபரணி நதிக்கரையில் உலகின் முதல் நடராஜர் திருமேனி அமைந்துள்ள செப்பறை அழகிய கூத்தர் திருக்கோவில் உள்ளது. கும்பாபிஷேக விழா செப்.,13ல் விக்னேஸ்வர பூஜையுடன் தொடங்கியது. தொடர்ந்து கணபதி, நவக்கிரக, லட்சுமி ஹோமங்கள் உள்ளிட்ட சிறப்பு ஹோமங்கள் நடந்தன. தாமிரபரணி நதியில் இருந்து புனிதநீர் எடுத்து வரப்பட்டு ஆறு கால யாகசாலை பூஜைகள் நடத்தப்பட்டன. நேற்று காலை ஆறாம் கால யாகசாலை பூஜைகள் நடந்தன. ஓதுவா மூர்த்திகள் திருமுறை பாராயணம் பாட, அர்ச்சகர்கள் வேத மந்திரங்கள் முழங்க பூஜைகள் நடத்தினர். பின்னர் மகா கலசங்களுக்கு தீபாராதனை செய்யப்பட்டு, அர்ச்சகர்கள் கலசங்களை தலையில் சுமந்து ஊர்வலமாக கோவிலுக்கு கொண்டு வந்தனர். மூலவர் அழகிய கூத்தர் விமானம், நெல்லையப்பர், காந்திமதி அம்பாள் விமான கலசங்களுக்கு புனிதநீர் ஊற்றப்பட்டு மகா கும்பாபிஷேகம் நடந்தது. பஞ்ச வாத்தியங்கள், மேளதாளங்கள் முழங்க, வேத மந்திரங்கள் மற்றும் திருமுறை பாராயணத்துடன் நடந்த கும்பாபிஷேகத்தை தமிழகத்தின் பல்வேறு பகுதிகளில் இருந்து வந்த ஆயிரக்கணக்கான பக்தர்கள் தரிசனம் செய்தனர். தொடர்ந்து அழகிய கூத்தருக்கு மகா அபிஷேகமும், மாலையில் சுவாமி அம்பாள் திருக்கல்யாணம், திருவீதி உலாவும் நடந்தது.