கோவிலாப்பட்டியில் சமண தீர்த்தங்கரர்களை தரிசித்து சிறப்பு வழிபாடு

திருப்புத்தூர்: திருப்புத்தூர் ஒன்றிய மணக்குடி, கோவிலாப்பட்டியில் சமண தீர்த்தங்கரர்களை தரிசித்து சிறப்பு வழிபாடு நடந்தது.

மதுரை சமணர் பண்பாட்டு மையம் சார்பில் பக்தர்கள் திருப்புத்தூர் ஒன்றியம் காரையூர் ஊராட்சி மணக்குடி வந்தனர். அவர்களுக்கு கிராமத்தினர், பூசகர்கள் சால்வை அணிவித்து வரவேற்பளித்தனர். தொடர்ந்து கிராமத்தினர்,பூசகர்களை பண்பாட்டு மைய செயலர் அனந்தராஜ் கெளரவித்தார். பின்னர் மணக்குடி பாலாற்றுக்கரையில் எழுந்தருளியுள்ள சமண தீர்த்தங்கரர் அருகத்தேவர் சிற்பத்தை தூய்மைப்படுத்தினர் . தொடர்ந்து பால்,சந்தனத்தால் அபி ஷேகம் நடத்தி, மலர்கள்,பழங்களால் ஆராதனை செய்தனர். பின்னர் சிறப்பு பூஜைகள் செய்து தீபராதனை நடந்தது. அப்போது அகிம்சை நடை ஏற்பாட்டாளர் ஸ்ரீதர் பேசுகையில்,‛ தீர்த்தங்கரர் என்பது தெரியாமலேயே பெண் தெய்வமாக வழிபட்டு சிற்பத்தை கூடாரமிட்டு பாதுகாத்து வழிபட்டு வரும் கிராமத்தினருக்கு நன்றி’ தெரிவித்தார். பின்னர் மகிபாலன்பட்டி ஊராட்சி கோவிலாபட்டிக்கு சென்று விருசுழியாற்றுக்கரையில் எழுந்தருளியுள்ள சமண தீர்த்தங்கரர் ரிஷபநாதரை தரிசித்து சிறப்பு வழிபாடு நடத்தினர். தொடர்ந்து சமண சின்னம் உள்ள கண்ணாங்கரைக்குடி சென்றனர்.