திருப்போரூர் கந்தசுவாமி கோவிலில் பால்குட ஊர்வலம்!

திருப்போரூர் : திருப்போரூர் கந்தசுவாமி கோவிலில், பொங்கல் பால்குட ஊர்வலம், கோலாகலமாக நடந்தது. திருப்போரூர் கந்தன் வழிபாட்டு மன்றத்தினர், ஆண்டுதோறும், கார்த்திகை மாதத்தில், பச்சை நிற மாலையணிந்து, இரண்டு மாதங்கள் கிரிவலம் வருவர். பொங்கல் நாளில், பால்குடம் எடுத்து, கந்தனுக்கு அபிஷேகம் செய்வர். இந்தாண்டு, பொங்கல் நாளன்று காலை 10 மணிக்கு காவடி மண்டபத்திலிருந்து புறப்பட்ட 508 பால்குட ஊர்வலம் கிழக்கு, தெற்கு மாடவீதிகள், அய்யம்பேட்டை தெரு, செங்கல்பட்டு சாலை வழியாக, கோவிலை வந்தடைந்தது. உற்சவர் மண்டபத்தில், பக்தர்கள் நீண்டவரிசையில் நின்று சுவாமிக்கு பால்குட அபிஷேகம் செய்தனர்.