த.மா.கா., தலைவர் வாசன்: நான் என்றைக்குமே முதல்வர் பதவிக்கு ஆசைப்பட்டது இல்லை. ஆனால், கட்சி தொண்டர்கள் ஆசையை வெளிப்படுத்தி இருக்கலாம். அது, அவர்களின் உரிமை; அதை மறுக்க முடியாது. பிரதமர் மோடியின் வழிகாட்டுதலுடன் தமிழகத்தில் காமராஜர் ஆட்சி அமையும். காமராஜர் அரிச்சுவடியுடன் ஆட்சி அமைவதற்கு, அரசியல் சூழ்நிலை பிரகாசமாக இருக்கிறது.டவுட் தனபாலு: பிரதமர் வழிகாட்டுதலுடன், தமிழகத்தில் தாமரையை மலர வைக்க அண்ணாமலை படாதபாடு பட்டுட்டு இருக்காரே... அதனால, உங்களது காமராஜர் ஆட்சி கனவுக்கு, அவங்க உறுதுணையா இருப்பாங்களா என்பது, 'டவுட்' தான்!வேலுார் தொகுதி, பா.ஜ., கூட்டணி வேட்பாளரும், புதிய நீதிக்கட்சி தலைவருமான, ஏ.சி.சண்முகம்: காங்., ஆட்சி காலத்தில் தான், கச்சத்தீவு இலங்கைக்கு தாரை வார்க்கப்பட்டது. தற்போது, சீனாவின் நீர்மூழ்கி கப்பல், கச்சத்தீவில் வந்து நிற்கிறது; இந்தியாவை வேவு பார்க்கிறது. இந்திய, இலங்கை மீனவர்கள் பாதிக்கப்படுவதால், இந்த விஷயத்தை வெளியே கொண்டு வர இதுவே சரியான நேரம் என இந்தியா கருதுகிறது. மூன்றாவது முறையாக, மோடி பிரதமராக வரும் போது, நிச்சயமாக, கச்சத்தீவை மீட்பார்.டவுட் தனபாலு: 'கச்சத்தீவு பிரச்னையை இப்ப ஏன், பா.ஜ., கிளப்புது' என்ற கேள்விக்கு, அந்த கட்சியினரை விட இவர், 'லாஜிக்'கா விளக்கம் தர்றாரே... வேலுார்ல இந்த முறை இவர் ஜெயிச்சிட்டார்னா, மத்திய, பா.ஜ., அரசுல அமைச்சர் பதவி உறுதி என்பதில், 'டவுட்'டே இல்லை!பத்திரிகை செய்தி: 'மத்தியில் காங்கிரஸ் ஆட்சிக்கு வந்தால், மத்திய அரசு வேலைகளில் சரி பாதி இடங்கள் பெண்களுக்கு ஒதுக்கப்படும்; ஏழை பெண்களுக்கு ஆண்டுக்கு 1 லட்சம் ரூபாய் வழங்கப்படும்' என தேர்தல் அறிக்கையில் அக்கட்சி வாக்குறுதி அளித்துள்ளது. டவுட் தனபாலு: மத்தியில் ஆட்சியை பிடிக்கிறது இருக்கட்டும்... இப்ப, காங்., ஆட்சியில இருக்கிற கர்நாடகா, தெலுங்கானா, ஹிமாச்சல் பிரதேசங்கள்ல முதல்ல இந்த வாக்குறுதிகளை, 'டிரெய்லர்' மாதிரி நிறைவேற்றி இருக்கலாமே... அப்படி செஞ்சுட்டு வாக்குறுதி தந்திருந்தால், 'டவுட்'டே இல்லாம காங்கிரசை மக்கள் நம்பியிருப்பாங்க!