இளஸ் மனஸ்! (92)

அன்பு பிளாரன்ஸ்...என் வயது, 43; பணக்கார குடும்பத்து பெண். கணவர், சென்னை - பெங்களூரு இடையே, ஆம்னி பேருந்து போக்குவரத்து நடத்துகிறார். எங்களிடம், 20க்கும் மேற்பட்ட பேருந்துகள் உள்ளன. நான், 10க்கும் மேற்பட்ட வீடுகளை வாடகைக்கு விட்டுள்ளேன். எங்களுக்கு இரு மகன்கள்; மூத்தவன் பிலிம் இன்ஸ்டியூட்டில், சினிமா இயக்குனர் படிப்பை படிக்கிறான். சின்னவனுக்கு வயது 15; எப்படியோ அவனுக்கு சர்க்கஸ் கோமாளிகள் மீது ஈடுபாடு வந்து விட்டது. 'உலக புகழ் பெற்ற சர்க்கஸ் பபூனாக வேண்டும்; அது சம்மந்தமான படிப்பு ஏதாவது இருந்தால், சேர்த்து விடுங்கள்...' என அடம் பிடிக்கிறான். 'படிப்பு இல்லை என்றால், நேரடியாக சர்க்கசில் சேர்த்து விடுங்கள்... தொழில் கற்றுக் கொள்கிறேன்...' என்கிறான். என்ன செய்யலாம்... தக்க அறிவுரை வழங்க வேண்டுகிறேன்.அன்பு அம்மா...சர்க்கசில் காட்டப்படும் எல்லா வித்தைகளும் கற்றவர் பபூன். ஒரு காட்சிக்கும், இன்னொரு காட்சிக்கும் இடையே ஏற்படும் தொய்வை, 'ஸ்லாப்ஸ்டிக்' மற்றும் உடல் ரீதியான நகைச்சுவைகளால், ஈடு செய்வார். அவர்கள், 'மைமிங்' கலையில் விற்பன்னர்கள். கயிறு மேல் நடப்பது, ஒற்றை சக்கர மிதிவண்டி ஓட்டுவது, ஜக்கிளிங் செய்வது அவர்கள் வேலை. உலகப்புகழ் பெற்ற சர்க்கஸ் கோமாளிகளாக, ஜார்ஜ் கர்ல், ஜாங்கோ எட்வர்ட்ஸ், ரஸ்ஸல் ஸ்காட், ஜஸ்டின் பிளச்சர், கொய்ல் டோப்ஸ், எரிக்டேவிஸ், ஜான் கில்கி, அச்சில் ஜவாட்டா, பியர்ரி எட்டாக்ஸ், ரோலி பெய்ன் ஆகியோரை குறிப்பிடலாம். இந்தியாவில்...ஜம்போ சர்க்கஸ், கிரேட் ராயல் சர்க்கஸ், ராம்போ சர்க்கஸ், ஜெமினி சர்க்கஸ், ரேமன் சர்க்கஸ், ராஜ்கமல் சர்க்கஸ், அமர் சர்க்கஸ் மற்றும் கமலா சர்க்கஸ் ஆகிய நிறுவனங்கள் உள்ளன.சர்க்கஸ் தொழில் வெகுவாக நசிந்து விட்டது; அதற்கு முதல் காரணம், சினிமா, 'டிவி' சேனல்கள் பெருகியது தான். அது தவிர, வனவிலங்குகள் பாதுகாப்பு சட்டம் தீவிரமாக அமல்படுத்தப்பட்டதால், சிங்கம், புலி, யானை வித்தைகள் நிறுத்தப்பட்டு விட்டன. சர்க்கஸ் கோமாளிகளுக்கு, உலக கோமாளிகள் அசோசியேஷன் என்ற அமைப்பு இருக்கிறது. கேரள மாநிலம், கண்ணுாரில், 1901ல் சர்க்கஸ் அகாடமி துவங்கப்பட்டது. கேரள மாநிலம், சிரகாராவில், கீழரி குன்னி கண்ணன் நினைவு சர்க்கஸ் பயிற்சி மையத்தை, 1939ல் துவங்கினார் எம்.கே.ராமன். இங்கு நான்கு ஆண்டுகள் படிப்பு; ஆண்டிற்கு, 20 மாணவர்கள் சேர்க்கை உண்டு. சர்க்கசில் அனைத்து நுணுக்கங்களும் கற்றுக் கொடுக்கப்பட்டன. அதிகம் மாணவர்கள் சேராததால், ஆசிரியர்களுக்கு சரி வர சம்பளம் கொடுக்கவில்லை. எனவே, சர்க்கஸ் அகாடமியை, 2016ல் மூடி விட்டனர். மகனை, ஜிம்னாஸ்டிக் பயிற்சிகள் மேற்கொள்ள வைத்து, மாநில அளவில், பதக்கங்கள் பெற வைக்கலாம். வேலை வாய்ப்புக்கு உதவும். இந்தியாவின் ஏதாவது ஒரு சர்க்கஸ் நிறுவனத்தில் பபூனை தொடர்பு கொண்டு, மகனுடன் பேச வைக்கவும். மேலான அறிவுரைகளை, கசப்பான உண்மைகளை, அந்த பபூன் எடுத்து கூறுவார். பபூன் ஆகும் ஆசை ஓடி விடும். - இனிய அன்புடன், பிளாரன்ஸ்.