உள்ளூர் செய்திகள்

அன்புடன் அந்தரங்கம்!

அன்பு சகோதரிக்கு, நான், 48 வயது ஆண். மிக்ஸி, கிரைண்டருக்கான உதிரிபாகங்கள் தயாரிக்கும் தொழிற்சாலை வைத்துள்ளேன்; 300 தொழிலாளர்கள் வேலை செய்கின்றனர். எனக்கு திருமணமாகி, இரு மகன்கள் உள்ளனர். மனைவியின் வயது: 40. மூத்த மகன் படித்து, என்னுடன், தொழிற்சாலையை கவனித்துக் கொள்கிறான். இளையவன், வெளிநாட்டில் படித்துக் கொண்டிருக்கிறான். என் மனைவி தான் எனக்கு மிகப்பெரிய பிரச்னையாக இருக்கிறாள். எங்கள் குடும்பத்தை விட, மனைவியின் குடும்பம் வசதி படைத்தது. வீட்டிற்கு ஒரே மகள்; செல்லமாக வளர்ந்தவள். அவர்களாகவே விரும்பி வந்து, என்னை மாப்பிள்ளையாக்கி கொண்டனர். தற்பெருமையும், 'ஈகோ'வும் அதிகம் உள்ளவள். எனக்கு இரு சகோதரிகள். இருவருக்கும் திருமணமாகி விட்டது. திருமணமானதிலிருந்தே எங்கள் வீட்டினருடன் நெருங்கி பழக மாட்டாள், என் மனைவி. யாருடைய வீட்டு விசேஷத்துக்கும் வர மாட்டாள். என் வீட்டிற்கும், எந்த உறவினரும் வரக் கூடாது என்பாள். அக்கம்பக்கத்தினரிடமும் பேச்சு வைத்துக்கொள்ள மாட்டாள். எது கேட்டாலும் எடுத்தெறிந்து தான் பேசுவாள். என் பெற்றோரையும் மரியாதைக் குறைவாக பேச, அவர்கள் தனியாக சென்று விட்டனர். நான் தான் வாரம் ஒருமுறை சென்று பார்த்து வருவேன். நல்லவேளை மகன்கள் இருவரும், எல்லாருடனும் சகஜமாக பேசி பழகுவர். அதற்கு காரணம், என் பெற்றோர் தான் அவர்களை வளர்த்து ஆளாக்கினர். அதற்கும் குறை கூறுவாள்; நான் கண்டுகொள்ள மாட்டேன். பிரச்னை வரக்கூடாது என்று, முடிந்த அளவு, மனைவியின் போக்கிலேயே சென்று விடுவேன். வீட்டில் எல்லாவற்றுக்கும் பணியாட்கள் இருப்பதால், வேலை பளுவும் மனைவிக்கு இல்லை. ஆனால், எப்போதும், 'கடுகடு'வென்றே இருப்பாள். என் தங்கைகள், வீட்டு விசேஷத்துக்கு அழைக்க வந்தால், முகத்தை துாக்கி வைத்துக் கொள்வாள். என்னையும் போகக்கூடாது என்று தடுப்பாள். அப்படியெல்லாம் ஒதுங்கி இருக்க முடியாது, என்று கட்டாயப்படுத்தி அழைத்து சென்று விட்டால், அவ்வளவு தான். வீட்டிற்கு திரும்பியதும், கையில் கிடைத்த பொருட்களை துாக்கி வீசி, பெரிய ரகளை செய்து விடுவாள். இதெல்லாம் தவறு என்று பலமுறை அறிவுறுத்தி விட்டேன். அவளது பெற்றோரிடமும் சொல்லி பார்த்து விட்டேன். அவளுடன் பேசாமல் ஒருவாரம் கூட இருந்து விட்டேன். வெளியூர் சென்று ஒரு வாரம் இருந்துவிட்டு வந்தேன். எதற்கும் திருந்தியபாடில்லை. இவளை விவாகரத்து செய்து விடலாம் என்று கூட தோன்றுகிறது. என் மூத்த மகனுக்கு திருமணம் செய்து வைக்க விரும்புகிறேன். ஆனால், வரும் மருமகளை என்ன பாடுபடுத்துவாளோ என்றும் பயமாக இருக்கிறது. என் மகனும் கஷ்டப்படுவான். மனைவியை எப்படி திருத்துவது, சகோதரி. -இப்படிக்கு, உங்கள் சகோதரன். அன்பு சகோதரருக்கு, உங்களுக்கும், உங்கள் மனைவிக்கும் திருமணமாகி, 22 ஆண்டுகள் ஆகியிருக்கும் என்று நினைக்கிறேன். அவரது பணத்தில் தான், நீங்கள் தொழிற்சாலையை நிறுவி இருப்பீர்கள் எனவும் யூகிக்கிறேன். 21 வயதில், மூத்த மகன். 18 வயதில், இரண்டாவது மகன். இத்தனை ஆண்டுகள் நீங்கள் குற்றப்பட்டியல் தயாரித்து சுமத்தும் இதே மனைவியுடன் தான் குடும்பம் நடத்தி உள்ளீர்கள். அப்போதெல்லாம் உங்களுக்கு விவாகரத்து எண்ணம் வரவில்லை. 22 ஆண்டுகள் ஒரு பொருளை பயன்படுத்திய பிறகு அதை துாக்கியெறிய ஆசைப்படுகிறீர். பொதுவாக ஆண்கள் பிறபெண்களிடம் அனுதாபம் தேட, தங்கள் மனைவியை குறை கூறுவர். வாழ்க்கை எனும் விமானத்தை செலுத்தும் தலைமை பைலட் நீங்கள். உதவி பைலட் உங்கள் மனைவி. பயண துாரத்தில் முக்கால்வாசி பறந்து விட்டு, கோ பைலட்டை நடுவானில் வீசியெறிய முடியுமா? திருமணமான புதிதிலேயே மனைவியுடன் பேசி, அவளை ஆணவத்திலிருந்தும், முன்கோபத்திலிருந்தும் வெளியே கொண்டு வந்திருக்க வேண்டும். அப்போதெல்லாம் பொருளாதார ஆதாரத்துக்காக மவுனியாக இருந்து விட்டு, இப்போது கலகக்குரல் எழுப்புவது ஏன்? உங்கள் மனைவிக்கும், உங்கள் தங்கைகளுக்கும் இடையேயான உறவுமுறை சிக்கலில் இரு தரப்பாரும் தவறு இழைத்தவர்களாக இருப்பர். உங்களுக்கும், உங்கள் மகன்களுக்கும் இடையேயான தகவல் தொடர்பு எப்படி இருக்கிறது? உங்கள் மனைவிக்கும், உங்கள் மகன்களுக்கும் இடையே உள்ள தகவல் தொடர்பு எப்படி இருக்கிறது? உங்களுக்கு, உங்கள் மனைவி எட்டிக்காயாக கசக்கலாம். உங்கள் மகன்களுக்கு, அவர்களது தாய், தேனாக இனிக்கலாம். உங்கள் தங்கைகளை உங்கள் பெற்றோரை அந்நியமாக கருதும் உங்கள் மனைவி, தன் மகனையும், அவனுக்கு மனைவியாக வரும் மருமகளையும் வெறுத்து ஒதுக்குவாரா? எழுதி வைத்துக் கொள்ளுங்கள் சகோதரரே... உங்கள் மனைவி தனக்கு வரும் மருமகளை கொஞ்சி, அரவணைத்துக் கொள்வார். உங்களுக்கு, என்னுடைய எளிமையான அறிவுரை... கடந்த, 22 ஆண்டுகள் திருமண வாழ்க்கையை எப்படி நகர்த்தினீர்களோ, அதே சூட்சமத்தில் மீதி வாழ்நாளை நகர்த்துங்கள். அவ்வப்போது சக்சரவுகள் இல்லாத பேச்சுவார்த்தையை மனைவியுடன் நிகழ்த்துங்கள். மனைவியிடம் சொல்ல விரும்பும் விஷயங்களை, மகன் மூலம் மனைவிக்கு கடத்துங்கள். கடந்த, 22 ஆண்டுகளில் மனைவியுடன் இருந்த சந்தோஷமான தருணங்களை எண்ணி, மனைவி மீதான வெறுப்பை விட்டொழியுங்கள். - உங்கள் சகோதரி, சகுந்தலா கோபிநாத்.


தினமலர் சேனல்களுக்கு SUBSCRIBE செய்யுங்கள் !

வாசகர்கள் கருத்துகள் ( 14 )

SULLAN
அக் 29, 2026 15:38

என்ன தல அடி இன்னிக்கு கொஞ்சம் பலமா விழுதிருச்சி?? போல ??


Manikandan
செப் 10, 2026 15:30

Sir, your wife has Narcistic personality. This might be due to her parental trauma during her young ages. This can be treated with counselling. But the results will more than 20 or 30%. It is very rare for Narcistic people to change. So, if you feel that you have tried every option, pls speak to your sons and proceed for divorce. It is no point in spoiling your sons life. She will make their marriage life miserable. These acters never like to be in a happy family environment. You also deserve a 2nd chance. Also, pls dont go with the madams Sakunthala Gopinaths advice. She is completely outdated. Living in own dream world away from lifes realities.


Gowthaman Rathinam
செப் 10, 2026 07:33

தயவு செய்து சகுந்தலா கோபிநாத் கருத்துக்கள் நியாயமான விவாதமாக இல்லாமல், ஒட்டுமொத்த ஆண்களுக்கு எதிரான வன்மத்தையும், ஆண் வெறுப்பையும் Misandry பரப்புவதாக மட்டுமே இருக்கிறது. ஒரு சில தனிநபர்களின் தவறுகளுக்காக ஒட்டுமொத்த பாலினத்தையும் பொதுப்படையாகக் குற்றம் சாட்டுவது, தர்க்கத்திற்குப் புறம்பான ஒரு பகுத்தறிவற்ற நடத்தை irrational behavior ஆகும். இது தர்க்கத்தை விட சமூகப் பாகுபாட்டையே காட்டுகிறது.


Sathish
செப் 09, 2026 16:40

திருமதி சகுந்தலா இல்லை திருமதி சகுனி ... என்ன ஓரு அற்புதம்


Lakshmanan KR
செப் 08, 2026 21:41

தயவு செய்து இப்படி எதற்க்கெடுத்தாலும் ஆண்களை குறை சொல்லும் இந்த அம்மாவின் இந்த பகுதியையே தயவு செய்து நிறுத்துவது தினமலருக்கு நல்லது


Anand
செப் 08, 2026 13:34

உப்பை தின்றவன் தண்ணீர் குடிப்பான் என்கிற பழமொழிக்கேற்ப மருமகள் வந்தால் இதற்கு ஒரு முற்றுப்புள்ளி கிடைக்கும் , உங்கள் மனைவியின் ஆட்டம் அடங்கும் அதுவரை பொறுத்திருங்கள். நல்லதே நடக்கும்.


Anand
செப் 08, 2026 13:31

இது கிட்டத்தட்ட முக்கால்வாசி குடும்பங்களில் நடக்கும் கூத்துக்கள் தான். இன்னும் சில குடும்பங்களில் சட்டை கூட கிழியும், இவ்வளவு நாளா வாழ்ந்துவிட்டீர்கள், அதுவே பழகிப்போயிருக்குமே, பிறகெதற்கு காலம் போன பிறகு தேவையில்லாத சிந்தனைகள்? இனி அது கூடவே இருப்பதுதான் உங்களுக்கும், உங்கள் மகன்களுக்கும், உங்கள் குடும்பத்திற்கும் நல்லது. மகனுக்கு திருமணம் முடித்து கூட்டுக்குடும்பமாக இருந்தால் தினமும் அண்டா குண்டாக்கள் சிதறி உருண்டோடக்கூடும், தனிக்குடித்தனம் வைத்துவிடுங்கள்.


Rajesh
செப் 07, 2026 21:11

உங்ககிட்ட அறிவுரை கேட்குறதுக்கு பதிலா அவரு அந்த பொம்பள கூட வாழ்ந்துறலாம் ...


SJRR
செப் 07, 2026 15:02

ஆண்கள் என்றால் இப்படித்தான் என்ற மனநிலையில் அறிவுரை கூறி இருக்கிறார் சகோதரி சகுந்தலா கோபிநாத் அவர்கள். அந்த நபர் அவர் மனைவியின் சொத்தில் தான் தொழில் தொடங்கி உள்ளார் என்று கூறுகிறீர்கள். அவரும் அப்படி எந்த பதிவும் எழுதவில்லை. மேலும், வரும் மருமகளை நன்றாக பார்த்துக்கொள்வார் என்று ஆருடம் வேறு கூறுகிறீர்கள். அந்தப்பெண் வரும் மருமகளையும் யாரிடமும் சேராத வண்ணம் வீட்டில் அடக்கி வைப்பர் என்று நானும் ஆருடம் கூறுகிறேன். இருவரும் தங்களுடைய ஈகோவை விட்டு எப்படி பிரச்சனையை தீர்க்கவேண்டும் என்று ஆலோசனை கூறாமல், அவர் அப்படித்தான் நீங்கள் தான் அனுசரித்து வாழவேண்டும் என்று கூறுவதற்கு அவர் எதற்கு உங்களுக்கு எதற்கு கடிதம் எழுத வேண்டும்?


thonipuramVijay
செப் 07, 2026 12:58

என்ன ஒரு ஆணவமான பெண்ணை சார்ந்து ஆணை அவமதிக்கும் ஆசிரியரின் அறிவுரை ...கண்டிக்கத்தக்கது .... இவளை போன்ற பெண்கள் திருந்தமாட்டார்கள்... நீங்கள் விவாகரத்து தேய்த்து விட்டு ஒரு 24 வயது நல்ல பெண்ணை பார்த்து வாழ்க்கையை அனுபவியுங்கள்...