ஜி.எஸ்.டி., வசூல் ரூ.1.73 லட்சம் கோடி

புதுடில்லி: கடந்த செப்டம்பர் மாதத்துக்கான ஜி.எஸ்.டி., வசூல், 6.50 சதவீதம் வளர்ச்சியடைந்து, 1.73 லட்சம் கோடி ரூபாயாக இருந்தது என, மத்திய அரசு தெரிவித்துள்ளது. இதுவே, கடந்த 40 மாதங்களில் குறைவான ஜி.எஸ்.டி., வளர்ச்சி விகிதமாகும்.கடந்த ஆகஸ்ட் மாதத்தில் ஜி.எஸ்.டி., வசூல், 1.75 லட்சம் கோடி ரூபாயாகவும்; கடந்தாண்டு செப்டம்பரில் 1.63 லட்சம் கோடி ரூபாயாகவும் இருந்தது குறிப்பிடத்தக்கது.கடந்த மாதம் உள்நாட்டு வருவாய் 5.90 சதவீதம் அதிகரித்து, 1.27 லட்சம் கோடி ரூபாயாகவும்; இறக்குமதி வாயிலான வருவாய் 8 சதவீதம் உயர்ந்து, 45,390 கோடி ரூபாயாகவும் இருந்தது. ரீபண்டுகள், 20,458 கோடி ரூபாய்க்கு வழங்கப்பட்டுள்ளன. இதையடுத்து, நிகர ஜி.எஸ்.டி., வசூல், 1.53 லட்சம் கோடி ரூபாயாக இருந்தது.