மணல் கடத்தலுக்கு ரூ.47 கோடி அபராதம்

பெங்களூரு; 'மணல் கடத்தியதற்காக, கடந்த ஐந்து ஆண்டுகளில் 7,629 வழக்குகள் பதிவாகி, 47 கோடி ரூபாய் அபராதம் வசூலிக்கப்பட்டது,'' என, மேல்சபையில் அமைச்சர் மல்லிகார்ஜுன் தெரிவித்தார்.மேல்சபையில் பா.ஜ., உறுப்பினர் தனஞ்செய சர்ஜி கேள்விக்கு, பதிலளித்து சுரங்கம், தோட்டக்கலைத் துறை அமைச்சர் மல்லிகார்ஜுன் பேசியதாவது:கர்நாடகாவில் மணல் கடத்தியதற்காக, கடந்த ஐந்து ஆண்டுகளில் 7,629 வழக்குகள் பதிவாகி உள்ளன. இதற்காக 47 கோடி ரூபாய் அபராதம் வசூலிக்கப்பட்டு உள்ளது.கர்நாடகாவில் 2023 - 24ல், 24 லட்சத்து 10 ஆயிரத்து 236 மெட்ரிக் டன் மணல் விற்பனை செய்யப்பட்டு உள்ளது. இதன் மூலம், 35.68 கோடி ரூபாய் வசூலிக்கப்பட்டுள்ளது.மணல் கடத்தலைத் தடுக்க, மாவட்ட கலெக்டர் தலைமையில் மணல் கடத்தல் தடுப்பு படை கமிட்டி அமைக்கப்பட்டு உள்ளது.இவ்வாறு அவர் கூறினார்.