தேடப்பட்ட 37 நக்சல்கள் சத்தீஸ்கர் போலீசில் சரண்

தண்டேவாடா: சத்தீஸ்கரில் பல்வேறு குற்ற வழக்குகளில் தேடப்பட்ட, 12 பெண்கள் உட்பட 37 நக்சல்கள் போலீசில் நேற்று சரணடைந்தனர். சத்தீஸ்கரில், முதல்வர் விஷ்ணு தியோ சாய் தலைமையிலான பா.ஜ., ஆட்சி நடக்கிறது. இங்கு, பஸ்தார் மண்டலத்துக்கு உட்பட்ட பகுதிகளில் நக்சல் ஆதிக்கத்தை கட்டுப்படுத்த, மத்திய மற்றும் மாநில அரசுகள் தீவிர நடவடிக்கை எடுத்து வருகின்றன. அடுத்த ஆண்டு மார்ச் மாதத்திற்குள் நக்சல் ஆதிக்கத்தை முற்றிலும் ஒழிக்க பிரதமர் நரேந்திர மோடி, மத்திய உள்துறை அமைச்சர் அமித் ஷா உள்ளிட்டோர் கெடு விதித்துள்ளனர். இதைத் தொடர்ந்து, நக்சல் இயக்கத்தினர் திருந்தி வாழ சந்தர்ப்பம் அளிக்கும் வகையில், அவர்களுக்கான மறுவாழ்வு திட்டங்களையும் மத்திய, மாநில அரசுகள் நடை முறைப்படுத்தி உள்ளன. இதன்படி சத்தீஸ்கரின் தண்டேவாடா பகுதியில் இயங்கிய நக்சல் இயக்கத்தைச் சேர்ந்த, 12 பெண்கள் உட்பட 37 பேர் நேற்று தங்கள் ஆயுதங்களை ஒப்படைத்து, போலீசில் சரணடைந்தனர். சரணடைந்தவர்களில், 27 பேரைப் பற்றி தகவல் தெரிவிப்போருக்கு 65 லட்சம் ரூபாய் பரிசு ஏற்கனவே அறிவிக்கப் பட்டிருந்தது. சத்தீஸ்கரில், கடந்த இரண்டு ஆண்டுகளில் மட்டும் 2,200க்கும் மேற்பட்ட நக்சல்கள் சரணடைந்துள்ளதாக போலீசார் தரப்பில் தெரிவிக்கப்பட்டுள்ளது.