உத்தரபிரதேசத்தில் வேன் மீது பஸ் மோதியது; ஒரே குடும்பத்தில் 6 பேர் பரிதாப பலி

லக்னோ: உத்தரபிரதேசத்தில் வேன் மீது பஸ் மோதிய விபத்தில், ஒரே குடும்பத்தைச் சேர்ந்த 6 பேர் உயிரிழந்த சம்பவம் சோகத்தை ஏற்படுத்தி உள்ளது.உத்தரபிரதேச மாநிலம் மொராதாபாத் மாவட்டத்தில் உள்ள கட்கர் பகுதியில், வேன் வேகமாக வந்த பஸ் மீது மோதி விபத்துக்குள்ளானது. தகவல் அறிந்து சம்பவ இடத்திற்கு விரைந்த போலீசார், உள்ளூர் மக்கள் உதவியுடன் மீட்பு பணி மேற்கொண்டனர். இந்த விபத்தில் சம்பவ இடத்திலேயே 6 பேர் உயிரிழந்தனர்.இவர்கள் அனைவரும் ஒரே குடும்பத்தை சேர்ந்தவர்கள் ஆவர். உறவினர் வீட்டு திருமணத்தில் கலந்து கொண்ட பிறகு, வேனில் வீடு திரும்பி கொண்டிருந்த போது விபத்து நிகழ்ந்தது விசாரணையில் தெரியவந்தது. இந்த விபத்தில் மேலும் ஐந்து பேர் படுகாயம் அடைந்தனர். இவர்கள் சிகிச்சைக்காக மருத்துவமனையில் அனுமதிக்கப்பட்டுள்ளனர். இதில் சிலரது நிலைமை கவலைக்கிடமாக உள்ளது. போலீசார் விசாரிக்கின்றனர்.