களைகட்டும் கல்வி சுற்றுலா

மாமல்லபுரம்: மாமல்லபுரம் பல்லவர் கால பாரம்பரிய கலைச்சின்னங்கள், சுற்றுலா பயணியரை கவர்ந்து வருகின்றன.இங்குள்ள கடற்கரை கோவில், ஐந்து ரதங்கள், அர்ஜுனன் தபசு, பிற குடவரைகளை காண, தினமும் ஏராளமான சுற்றுலா பயணியர் வருகின்றனர். இது ஒருபுறமிருக்க, பல்வேறு பகுதிகளிலிருந்து பள்ளி, கல்லுாரி மாணவ - மாணவியர், கல்வி சுற்றுலாவாகவும் அவ்வப்போது வருவர். தற்போது, பள்ளி வாகனங்கள், சுற்றுலா பேருந்து ஆகியவை, சில நாட்களாக மாமல்லபுரத்திற்கு படையெடுத்து வருகின்றன. கலைச்சிற்பங்கள், ஆங்கிலேயர் கால கலங்கரைவிளக்கம், கடல்சார் அருங்காட்சியகம் மற்றும் கடற்கரையை மாணவர்கள் கண்டு ரசித்து, மாமல்லபுரத்தின் வரலாற்றை கேட்டு ஆச்சரியப்பட்டனர்.