டில்லி அணி திரில் வெற்றி: கடைசி பந்தில் மும்பை ஏமாற்றம்

வதோதரா: பிரிமியர் லீக் போட்டியில் கடைசி பந்தில் அசத்திய டில்லி அணி 2 விக்கெட் வித்தியாசத்தில் 'திரில்' வெற்றி பெற்றது.இந்தியாவில், பெண்கள் பிரிமியர் லீக் 3வது சீசன் நடக்கிறது. வதோதராவில் (குஜராத்) நடந்த லீக் போட்டியில் மும்பை, டில்லி அணிகள் மோதின. 'டாஸ்' வென்ற டில்லி அணி 'பீல்டிங்' தேர்வு செய்தது.மும்பை அணிக்கு நாட் சிவர்-புருன்ட் (80), கேப்டன் ஹர்மன்பிரீத் கவுர் (42) கைகொடுக்க, 19.1 ஓவரில் 164 ரன்னுக்கு 'ஆல்-அவுட்' ஆனது. டில்லி அணி சார்பில் அன்னாபெல் 3, ஷிகா 2 விக்கெட் சாய்த்தனர்.சவாலான இலக்கை விரட்டிய டில்லி அணிக்கு ஷபாலி வர்மா (43) நம்பிக்கை தந்தார். ஜிந்திமணி கலிதா வீசிய கடைசி ஓவரில் வெற்றிக்கு 10 ரன் தேவைப்பட்டன. முதல் 5 பந்தில் 8 ரன் கிடைத்தது. கடைசி பந்தில் அருந்ததி 2 ரன் எடுத்தார். டில்லி அணி 20 ஓவரில் 8 விக்கெட்டுக்கு 165 ரன் எடுத்து 'திரில்' வெற்றி பெற்றது. ராதா (9), அருந்ததி (2) அவுட்டாகாமல் இருந்தனர்.