இந்தியா-பாகிஸ்தான் மோதல்: சாம்பியன்ஸ் டிராபியில் எப்போது

துபாய்: பாகிஸ்தானில், ஐ.சி.சி., சாம்பியன்ஸ் டிராபி 9வது சீசன் வரும் பிப். 19 முதல் மார்ச் 9 வரை நடக்கவுள்ளது. இதில் நடப்பு சாம்பியன் பாகிஸ்தான், இந்தியா, நியூசிலாந்து, ஆஸ்திரேலியா உள்ளிட்ட 8 அணிகள் பங்கேற்கின்றன. இதற்கான போட்டிகள் கராச்சி, லாகூர், ராவல்பிண்டியில் நடக்கவுள்ளன.அரசியல் காரணங்களுக்காக இந்திய அணி, பாகிஸ்தான் சென்று போட்டியில் பங்கேற்க மறுத்தது. இதனையடுத்து இந்திய அணி விளையாடும் போட்டிகளை மட்டும் துபாயில் நடத்திட முடிவானது.இத்தொடருக்கான அதிகாரப்பூர்வ அட்டவணை இன்னும் வெளியாகவில்லை. இருப்பினும் இந்திய அணி பங்கேற்கும் போட்டிகள் குறித்த தகவல் வெளியானது. இந்திய அணி 'ஏ' பிரிவில் பாகிஸ்தான், வங்கதேசம், நியூசிலாந்து அணிகளுடன் இடம் பிடித்துள்ளது. இந்திய அணி, தனது முதல் லீக் போட்டியில் வங்கதேசத்தை பிப். 20ல் சந்திக்கிறது. அதன்பின் பாகிஸ்தான் (பிப். 23), நியூசிலாந்து (மார்ச் 2) அணிகளை எதிர்கொள்கிறது. இம்மூன்று போட்டிகளும் துபாயில் நடக்கவுள்ளன.கராச்சியில் பிப். 19ல் நடக்கும் முதல் லீக் போட்டியில் பாகிஸ்தான், நியூசிலாந்து அணிகள் மோதுகின்றன. 'பி' பிரிவில் ஆப்கானிஸ்தான், ஆஸ்திரேலியா, இங்கிலாந்து, தென் ஆப்ரிக்கா அணிகள் இடம் பெற்றுள்ளன.லீக் சுற்றில் ஒவ்வொரு பிரிவிலும் முதலிரண்டு இடம் பிடிக்கும் அணிகள், வரும் மார்ச் 4, 5ல் நடக்கும் அரையிறுதியில் விளையாடும். பைனல் மார்ச் 9ல் நடக்கும். ஒருவேளை இந்திய அணி அரையிறுதி, பைனலுக்கு முன்னேறினால், போட்டிகள் துபாயில் நடத்தப்படும்.