ஜெய்ஸ்வால் நம்பர்-4: ஐ.சி.சி., தரவரிசையில் முன்னேற்றம்

துபாய்: ஐ.சி.சி., 'டி-20' பேட்டர் தரவரிசையில் இந்தியாவின் ஜெய்ஸ்வால் 4வது இடத்துக்கு முன்னேறினார்.சர்வதேச 'டி-20' போட்டியில் சிறந்து விளங்கும் வீரர்களுக்கான தரவரிசை பட்டியலை சர்வதேச கிரிக்கெட் கவுன்சில் (ஐ.சி.சி.,) துபாயில் வெளியிட்டது.பேட்டர்களுக்கான தரவரிசையில் இந்தியாவின் யாஷஸ்வி ஜெய்ஸ்வால், 757 புள்ளிகளுடன் 6வது இடத்தில் இருந்து 'நம்பர்-4' இடத்துக்கு முன்னேறினார். இலங்கைக்கு எதிரான 'டி-20' தொடரில் 3 போட்டியில், 80 ரன் எடுத்தார். இந்திய துவக்க வீரர் சுப்மன் கில் (613), 16 இடம் முன்னேறி முதன்முறையாக 21வது இடத்தை கைப்பற்றினார். மற்றொரு இந்திய வீரர் சூர்யகுமார் யாதவ் (805 புள்ளி) 'நம்பர்-2' இடத்தில் நீடிக்கிறார். முதலிடத்தில் ஆஸ்திரேலியாவின் டிராவிஸ் ஹெட் (844) தொடர்கிறார்.பிஷ்னோய் 'நம்பர்-10': பவுலர்களுக்கான தரவரிசையில் இந்திய சுழற்பந்துவீச்சாளர் ரவி பிஷ்னோய், 635 புள்ளிகளுடன் 18வது இடத்தில் இருந்து 10வது இடத்துக்கு முன்னேறினார். இலங்கை தொடரில் 'சுழலில்' அசத்திய இவர், அதிகபட்சமாக 6 விக்கெட் சாய்த்தார். மற்றொரு இந்திய சுழல் வீரர் அக்சர் படேல் (627) 13வது இடத்தை தக்கவைத்துக் கொண்டார்.மற்ற இந்திய பவுலர்களான அர்ஷ்தீப் சிங் (19வது இடம்), வாஷிங்டன் சுந்தர் (40வது), முகமது சிராஜ் (47வது) முன்னேற்றம் கண்டனர்.'ஆல்-ரவுண்டர்' தரவரிசையில் இந்தியாவின் ஹர்திக் பாண்ட்யா (199), அக்சர் படேல் (149) முறையே 6, 13வது இடத்தில் தொடர்கின்றனர்.

ஜோ ரூட் முதலிடம்

டெஸ்ட் பேட்டர் தரவரிசையில் இங்கிலாந்தின் ஜோ ரூட் (872 புள்ளி) மீண்டும் 'நம்பர்-1' இடத்துக்கு முன்னேறினார். இதற்கு முன் 2015, ஆகஸ்டில் வெளியான தரவரிசையில் முதலிடம் பிடித்திருந்தார். வெஸ்ட் இண்டீஸ் தொடரில் தனது 32வது டெஸ்ட் சதத்தை பதிவு செய்த ஜோ ரூட், டெஸ்ட் அரங்கில் 12 ஆயிரம் ரன் குவித்த 2வது இங்கிலாந்து வீரரானார். நியூசிலாந்தின் கேன் வில்லியம்சன் (859) 2வது இடத்துக்கு தள்ளப்பட்டார். பாகிஸ்தானின் பாபர் ஆசம், நியூசிலாந்தின் டேரில் மிட்செல் தலா 768 புள்ளிகளுடன் 3வது இடத்தை பகிந்து கொண்டுள்ளனர். ஆஸ்திரேலியாவின் ஸ்டீவ் ஸ்மித் (757) 5வது இடத்துக்கு முன்னேறினார்.