ராஞ்சியில் கிங் கோலி ராஜ்யம்: இந்திய அணி அசத்தல் வெற்றி

ராஞ்சி: ராஞ்சி ஒருநாள் போட்டியில் விராத் கோலி சதம் விளாச, இந்திய அணி 17 ரன் வித்தியாசத்தில் வெற்றி பெற்றது.இந்தியா வந்துள்ள தென் ஆப்ரிக்க அணி மூன்று போட்டிகள் கொண்ட ஒருநாள் தொடரில் பங்கேற்கிறது. முதல் போட்டி ஜார்க்கண்ட் தலைநகர் ராஞ்சியில் நடந்தது. இந்திய அணியில் ருதுராஜ் வாய்ப்பு பெற்றார்.தென் ஆப்ரிக்க அணியில் மஹாராஜ், 'ரெகுலர்' கேப்டன் பவுமாவுக்கு 'ரெஸ்ட்' கொடுக்கப்பட்டது. 'டாஸ்' வென்ற தற்காலிக கேப்டன் மார்க்ரம், 'பவுலிங்' தேர்வு செய்தார்.ரோகித் அரைசதம்: இந்திய அணிக்கு துவக்கத்தில் ஜெய்ஸ்வால் (18) நிலைக்கவில்லை. பின் அனுபவ ரோகித் சர்மா 38, கோலி 37, மிரட்டினர். 2வது விக்கெட்டுக்கு 136 ரன் சேர்த்தனர். பர்கர் பந்தில் ஜோர்ஜி கைநழுவ ஒரு ரன்னில் கண்டம் தப்பிய ரோகித், சுதாரித்து விளையாடினார். இந்திய வம்சாவளி வீரரான பிரேனலன் சுப்ராயன் ஓவரில் 2 சிக்சர் அடித்தார். பாஷ் ஓவரில் 2 சிக்சர் அடித்த கோலி அரைசதம் கடந்தார். ஒருநாள் அரங்கில் தனது 60வது அரைசதம் எட்டிய ரோகித், 57 ரன்னுக்கு (5x4, 3x6) அவுட்டானார். பார்ட்மென் பந்தில் பிரவிசின் அற்புத 'கேட்ச்சில்' ருதுராஜ் (8) நடையை கட்டினார். 5வது இடத்தில் களமிறக்கப்பட்ட வாஷிங்டன் சுந்தர் (13) சோபிக்கவில்லை. 52வது சதம்: பின் யான்சென் பந்தை பவுண்டரிக்கு அனுப்பிய கோலி, ஒருநாள் அரங்கில் 52வது சதம் எட்டினார். தொடர்ந்து சுப்ராயன் ஓவரில் கோலி (4,6,6,4) வெளுத்து வாங்க, 21 ரன் எடுக்கப்பட்டன. இவர், 135 ரன்னுக்கு (11x4, 7x6) வெளியேறினார்.கேப்டன் இன்னிங்ஸ்: கடைசி கட்டத்தில் கேப்டன் கே.எல்.ராகுல், ரவிந்திர ஜடேஜா விளாசினர். அரைசதம் கடந்த ராகுல், 60 ரன்னுக்கு (2x4, 3x6) அவுட்டானார். ஜடேஜா, 32 ரன் எடுத்தார். இந்திய அணி 50 ஓவரில் 349/8 ரன் குவித்தது. சபாஷ் ஹர்ஷித்: கடின இலக்கை துரத்திய தென் ஆப்ரிக்க அணிக்கு இந்திய 'வேகங்கள்' அதிர்ச்சி கொடுத்தனர். ஹர்ஷித் ராணா ஓவரில் ரிக்கிள்டன் (0), குயின்டன் (0) அவுட்டாகினர். அர்ஷ்தீப் பந்தில் கேப்டன் மார்க்ரம் (7) வெளியேற, 4.4 ஓவரில் 11/3 ரன் எடுத்து தவித்தது. குல்தீப் 'சுழலில்' ஜோர்ஜி (39) சிக்கினார். பிரவிஸ், 37 ரன் எடுத்தார். குல்தீப் திருப்பம்: பின் பிரீட்ஸ்கி, யான்சென் சேர்ந்து தொல்லை கொடுத்தனர். 26 பந்தில் அரைசதம் எட்டினார் யான்சென். 33 ஓவரில் 227/5 என இருந்தது. அடுத்த ஓவரை (34) வீசிய குல்தீப் திருப்புமுனை ஏற்படுத்தினார். முதல் பந்தில் யான்சென் (70), 3வது பந்தில் பிரீட்ஸ்கியை (72) அவுட்டாக்கினார். தனிநபராக போராடிய கார்பின் பாஷ் அரைசதம் கடந்தார்.கடைசி ஓவரில் தென் ஆப்ரிக்க வெற்றிக்கு 18 ரன் தேவைப்பட்டன. கைவசம் ஒரு விக்கெட் தான் இருந்தது. பிரசித் கிருஷ்ணா அருமையாக பந்துவீசினார். 2வது பந்தில் பாஷ் (67) அவுட்டானார். தென் ஆப்ரிக்க அணி 49.2 ஓவரில் 332 ரன்னுக்கு ஆல் அவுட்டாகி தோல்வி அடைந்தது. இந்தியா சார்பில் ஹர்ஷித் 3, குல்தீப் தலா 4 விக்கெட் வீழ்த்தினர். இரண்டாவது ஒருநாள் போட்டி டிச. 3ல் ராய்ப்பூரில் (சத்தீஸ்கர்) நடக்க உள்ளது. ராசியில்லா 'டாஸ்'ஒருநாள் அரங்கில் இந்திய அணி தொடர்ந்து 19வது முறையாக (2023, உலக கோப்பை பைனல்-ராஞ்சி) 'டாஸ்' வெல்ல தவறியது. 392 போட்டிஅதிக சர்வதேச போட்டிகளில் இணைந்து விளையாடிய இந்திய வீரர்கள் பட்டியலில் ரோகித்-கோலி (392 போட்டி) நேற்று முதலிடத்திற்கு முன்னேறினர். அடுத்த இடத்தில் சச்சின்-டிராவிட் (391) உள்ளனர். சர்வதேச அளவில் 6வது இடம் பெற்றனர். முதலிடத்தில் ஜெயவர்தனா, சங்ககரா (இலங்கை, 550 போட்டி) உள்ளனர். ரோகித் 352 'சிக்சர்'ராஞ்சியில் வாணவேடிக்கை காட்டிய ரோகித் சர்மா, ஒருநாள் போட்டிகளில் அதிக சிக்சர் (352 சிக்சர்/ 277 போட்டி) அடித்தவர் பட்டியலில் முதலிடம் பிடித்தார். அடுத்த இடங்களில் ஷாகித் அப்ரிதி (பாக்., 351/ 398), கெய்ல் (வெ.இ., 331/301), ஜெயசூர்யா (இலங்கை, 270/455), தோனி (இந்தியா, 229/350) உள்ளனர்.52வது சதம்ஒருநாள் அரங்கில் அதிக சதம் அடித்தவர் பட்டியலில் முதலிடத்தில் நீடிக்கிறார் கோலி (52 சதம்/ 306 போட்டி). அடுத்த இடங்களில் இந்தியாவின் சச்சின் (49 சதம்/ 463 போட்டி), ரோகித் சர்மா (33/277), பாண்டிங் (ஆஸி., 30/375) உள்ளனர். * மூன்றுவித கிரிக்கெட்டிலும் சேர்த்து அதிக சதம் அடித்தவர் பட்டியலில் சச்சினுக்கு(100) அடுத்து 2வது இடத்தில் உள்ளார் கோலி (83).* தென் ஆப்ரிக்காவுக்கு எதிராக ஒருநாள் போட்டிகளில் அதிக சதம் அடித்தவரானார் கோலி (6). அடுத்த இடத்தில் ( தலா 5 சதம்) சச்சின், வார்னர் (ஆஸி.,) உள்ளனர். * இது, சர்வதேச கிரிக்கெட்டில் (ஆண்கள்) அடிக்கப்பட்ட 7000வது சதம் ஆனது. * சர்வதேச கிரிக்கெட்டில், ஒரு 'பார்மட்டில்' 52 சதம் (ஒருநாள் போட்டியில்) அடித்த முதல் வீரர் என வரலாறு படைத்தார் கோலி. இதற்கு முன் டெஸ்டில் சச்சின், 51 சதம் அடித்திருந்தார். தொடரும் ஆதிக்கம்ராஞ்சியில் கோலி 77 (எதிர், இங்கி., 2013), 139 (எதிர், இலங்கை, 2014), 45 (எதிர், நியூசி., 2016), 123 (எதிர், ஆஸி., 2019), 135 (எதிர், தெ.ஆ., 2025) என ரன் மழை பொழிந்துள்ளார். இங்கு 5 இன்னிங்சில் 3 சதம் உட்பட 519 ரன் (சராசரி 173, ஸ்டிரைக் ரேட் 110.10) எடுத்துள்ளார்.* ஒருநாள் போட்டிகளில் 2வது முறையாக நேற்று 7 சிக்சர் அடித்தார் கோலி. இதற்கு முன் 2013ல் 7 சிக்சர் (எதிர், ஆஸி., ஜெய்ப்பூர்) அடித்திருந்தார். இலங்கைக்கு எதிராக அதிகபட்சமாக 8 சிக்சர் (எதிர், இலங்கை, 2023, திருவனந்தபுரம்) அடித்தார்.2வது அதிகம்ஒருநாள் போட்டிகளில் தென் ஆப்ரிக்காவுக்கு எதிராக நேற்று இந்தியா தனது இரண்டாவது அதிகபட்ச ஸ்கோரை (349/8) பதிவு செய்தது. முதலிடத்தில் 401/3 ரன் (குவாலியர், 2010) உள்ளது.