பெங்களூருவை வீழ்த்தியது கோவா: ஐ.எஸ்.எல்., கால்பந்தில்

கோவா: ஐ.எஸ்.எல்., கால்பந்து லீக் போட்டியில் கோவா அணி 3-0 என பெங்களூருவை வீழ்த்தியது.இந்தியன் சூப்பர் லீக் (ஐ.எஸ்.எல்.,) கால்பந்து 11வது சீசன் நடக்கிறது. நேற்று, கோவாவில் நடந்த லீக் போட்டியில் கோவா, பெங்களூரு அணிகள் மோதின. முதல் பாதி முடிவு கோல் எதுவுமின்றி சமநிலையில் இருந்தது. இரண்டாவது பாதியில் எழுச்சி கண்ட கோவா அணிக்கு அர்மான்டோ துரிம் சாதிகு (63வது நிமிடம்), பிரிசன் டியூபன் பெர்னாண்டஸ் (72வது), டெஜான் டிராசிக் (90+3வது) தலா ஒரு கோல் அடித்து கைகொடுத்தனர். கடைசி நிமிடம் வரை போராடிய பெங்களூரு அணியினரால் ஒரு கோல் கூட அடிக்க முடியவில்லை.ஆட்டநேர முடிவில் கோவா அணி 3-0 என்ற கணக்கில் வெற்றி பெற்றது. கோவா அணி, 7 போட்டியில் 2 வெற்றி, 3 'டிரா', 2 தோல்வி என 9 புள்ளிகளுடன் 5வது இடத்துக்கு முன்னேறியது. முதல் தோல்வியை பெற்ற பெங்களூரு அணி (5 வெற்றி, ஒரு 'டிரா') 16 புள்ளிகளுடன் முதலிடத்தில் நீடிக்கிறது.