தாம்பரம்- - செம்பாக்கம் பேருந்து மானாமதி வரை நீட்டிக்க கோரிக்கை

திருப்போரூர்:திருப்போரூர் ஒன்றியத்தில் அடங்கிய செம்பாக்கம் கிராமத்திற்கு, தாம்பரத்தில் இருந்து, தடம் எண்: 55 என்ற அரசு பேருந்து இயக்கப்படுகிறது. இப்பேருந்து, தாம்பரத்தில் இருந்து கூடுவாஞ்சேரி, நெல்லிக்குப்பம், கொட்டமேடு உள்ளிட்ட பகுதிகள் வழியாக செம்பாக்கம் வருகிறது. இதில், 4 கி.மீ.,யில் உள்ள மானாமதி கிராமம் வரை, இந்த பேருந்தை நீட்டிக்க வேண்டும் என, அப்பகுதி வாசிகள் கோரிக்கை விடுத்துள்ளனர். இதுகுறித்து, செம்பாக்கம் பகுதிவாசிகள் கூறியதாவது: மானாமதியை சுற்றியுள்ள பகுதி மக்கள், செம்பாக்கம், கொட்டமேடு, நெல்லிக்குப்பம், கூடுவாஞ்சேரி பகுதிக்கு செல்ல வேண்டுமானால், 20 கி.மீ., சுற்றி செல்ல வேண்டும். இதனால், அன்றாட தேவைகளுக்கு செல்வோர் கடும் அவதிப்பட்டு வருகின்றனர். எனவே, தடம் எண்: 55 என்ற அரசு பேருந்தை, மானாமதி வரை நீட்டிப்பு செய்தால், 20,000த்திற்கும் மேற்பட்டோருக்கு பயனுள்ளதாக அமையும். மேலும் பள்ளி, கல்லுாரி மற்றும் வேலைக்கு செல்வோருக்கும், மானாமதியை சுற்றியுள்ள கிராம மக்களுக்கும், இது உதவியாக இருக்கும். இவ்வாறு அவர் கூறினார்.