வட்ட வழங்கல் பிரிவு அலுவலகம் தரை தளத்திற்கு மாற்ற கோரிக்கை

திருப்போரூர்:திருப்போரூர் வட்டத்தில் திருப்போரூர், பையனுார், மானாமதி, கரும்பாக்கம், நெல்லிக்குப்பம், கேளம்பாக்கம் ஆகிய ஆறு குறுவட்டங்களில், 80க்கும் மேற்பட்ட கிராமங்கள் உள்ளன. இக்கிராமத்தில் உள்ள பொதுமக்கள் பல்வேறு தேவைகளுக்காக, தாலுகா அலுவலகம் வருகின்றனர்.தலுகா அலுவலகத்தில், தரை தளத்தில் சமூக பாதுகாப்பு திட்ட பிரிவு, ஆதார், இ- - சேவை மையம் உள்ளது. முதல் தளத்தில் தாசில்தார் அறை, நில அளவை பிரிவு உள்ளிட்டவை உள்ளன.இரண்டாம் தளத்தில் வட்ட வழங்கல் பிரிவு, பதிவறை, தேர்தல் பிரிவு உள்ளிட்டவை உள்ளன.வட்ட வழங்கல் பிரிவில், புதிய குடும்ப அட்டை கேட்டு விண்ணப்பிக்கும் மனு மீது விசாரணை, குடும்ப அட்டையில் பெயர் சேர்த்தல் மற்றும் நீக்குதல் குறித்த விசாரணை போன்ற குடும்ப அட்டை சம்பந்தமான பணிகளை, வட்ட வழங்கல் அலுவலர் மேற்கொள்கிறார்.இப்பணிகள் தொடர்பாக முதியவர்கள், மாற்றுத்திறனாளிகள் என பலர் வருகின்றனர். ஆனால், வட்ட வழங்கல் பிரிவு இரண்டாம் தளத்தில் உள்ளதால் முதியவர்கள், மாற்றுத்திறனாளிகள் படிக்கட்டில் ஏறி இறங்க முடியாமல் சிரமப்பட்டு வருகின்றனர்.எனவே, திருப்போரூர் தாலுகா அலுவலகத்தில் இரண்டாம் தளத்தில் உள்ள வட்ட வழங்கல் பிரிவை, தரை தளத்தில் மாற்ற நடவடிக்கை எடுக்க வேண்டும் என கோரிக்கை எழுந்துள்ளது.