ஆர்.கே.நகர்: ஆர்.கே.நகரில், 10 கோடி ரூபாயில் கட்டப்பட்டுள்ள பிரமாண்ட பல்நோக்கு விளையாட்டு வளாகத்தின் சுற்றுச்சுவர், தொட்டாலே உதிர்கிறது. சுவரின் கட்டுமானத்திலே இப்படியென்றால், வீரர்கள் விளையாடும் அரங்கங்களின் கட்டுமான பணி எப்படி நடந்திருக்குமோ என, அச்சம் ஏற்பட்டுள்ளது. வடசென்னை வளர்ச்சி திட்டத்தின் கீழ், ஆர்.கே.நகர், கொளத்துார் உள்ளிட்ட பகுதிகளில் பூங்காக்கள், விளையாட்டு மைதானம், முதல்வர் படைப்பகம் உள்ளிட்ட பணிகள் மேற்கொள்ளப்பட்டு வருகின்றன. இதில், வடசென்னையில் விளையாட்டு வீரர்கள் பயனடைய, பல்நோக்கு விளையாட்டு வளாகம் அமைக்கும் பணி, ஆர்.கே.நகர், சுண்ணாம்பு கால்வாய், மணலி சாலையை ஒட்டி துவங்கியது. சென்னை பெருநகர வளர்ச்சி குழுமம் எனும் சி.எம்.டி.ஏ., சார்பில், 10 கோடி ரூபாயில், 4 ஏக்கர் பரப்பில், கிரிக்கெட், கபடி பயிற்சி களம், ஆண்கள், பெண்களுக்கான தனித்தனி உடற்பயிற்சி கூடம் உள்ளிட்டவற்றின் கட்டுமான பணிகளை, 2023, நவம்பரில், துணை முதல்வர் உதயநிதி துவக்கி வைத்தார். பின் இந்த பணிகள் அனைத்தும், மாநகராட்சி வசம் ஒப்படைக்கப்பட்டது. இந்த வளாகத்தில் செஸ், கேரம், குத்துச்சண்டை, இறகுப்பந்து அரங்கங்கள், ஓடுதளம், சறுக்கு விளையாட்டிற்கான தளம், குழந்தைகளுக்கான விளையாட்டு கூடம் உள்ளிட்டவை அமைக்கப்பட்டு உள்ளன. முறைகேடு தவிர, 3,000 பேர் அமரும் வகையில் பெரிய ஆடிட்டோரியம், குடிநீர் வசதி, 20க்கும் மேற்பட்ட கழிப்பறைகள் உள்ளிட்ட அடிப்படை வசதிகளும் செய்யப்பட்டுள்ளன. மொத்தம் 95 சதவீத பணிகள் முடிவடைந்த நிலையில், அடுத்த 15 நாட்களுக்குள், பல்நோக்கு விளையாட்டு வளாகம் திறக்கப்பட உள்ளது. துணை முதல்வர் உதயநிதி நாள் ஒதுக்கியதும், இவ்வளாகம் திறக்கப்படும் என அதிகாரிகள் தெரிவிக்கின்றனர். ஆனால், கோடிக்கணக்கான ரூபாய் செலவிட்டும், இந்த பல்நோக்கு விளையாட்டு வளாக கட்டுமானத்தில் முறைகேடு நடந்திருப்பதாகவும், அதற்கு அச்சாணியாக விளையாட்டு வளாகத்தில் கட்டப்பட்டுள்ள சுற்றுச்சுவரில் சிமென்ட் கலவை தொட்டாலே உதிர்வதாகவும், குற்றச்சாட்டு எழுந்துள்ளது. சிறிய மழைக்கே தாக்கு பிடிக்காமல், சுவரின் சிமென்ட் கலவை உதிர்வதால், வீரர்களுக்காக கட்டப்பட்ட விளையாட்டு அரங்கங்கள் எந்த நிலையில் இருக்குமோ என, வீரர்களும், பகுதிமக்களும் பீதியடைந்துள்ளனர். வெட்ட வெளிச்சம் இதுகுறித்து, அ.தி.மு.க., மாவட்ட செயலர் ஆர்.எஸ்.ராஜேஷ் கூறியதாவது: தி.மு.க., ஆட்சியில், விளம்பரத்துக்காக மட்டுமே வரிப்பணத்தை வீணடிக்கும் நோக்கத்தில், ஸ்டாலின் அரசு செயல்படுகிறது. கைகளால் சுரண்டினாலே, சுற்றுச்சுவரின் சிமென்ட் கலவை உதிர்ந்து விழுகிறது. இதுதான், திராவிட மாடல் அரசின் செயல் திட்டம். இந்த ஆட்சியில் கொண்டு வந்த திட்டங்கள் எல்லாம், இப்படிதான் இருக்கும் என்பது, வெட்ட வெளிச்சமாகி உள்ளது. சுற்றுச்சுவரின் நிலையே இப்படியென்றால், உயிரை கொடுத்து வீரர்கள் விளையாடும் அரங்கங்களின் கட்டுமானம் எப்படி இருக்குமோ என்ற பீதி ஏற்பட்டுள்ளது. இது சம்பந்தமாக அரசு ஆய்வு செய்து, அதன் அறிக்கையை வெளிப்படையாக வெளியிட வேண்டும். இவ்வாறு அவர் கூறினார். இதுகுறித்து மாநகராட்சி கட்டட துறை தலைமை பொறியாளர் பாலமுருகன் என்பவர் கூறுகையில், ''விளையாட்டு வளாக சுற்றுச்சுவர் குறித்து புகார் வந்துள்ளது. விசாரித்து உரிய நடவடிக்கை எடுக்கப்படும்,'' என்றார்.
எந்தக் கொம்பனும் குறையே சொல்ல முடியாத ஊழல் மாடல் ஆட்சி. நாடும், நாட்டு மக்களும் எக்கேடு கெட்டுப் போனால் எங்களுக்கு என்ன? நாங்கள் கொள்ளையடிப்போம். சந்தோஷத்துக்கு கரகாட்டம், கார் ரேஸ் நடத்துவோம்.