திறந்தநிலை வடிகால்வாயை மூடுகால்வாயாக மாற்ற பெருங்குடி மண்டல குழு கூட்டத்தில் வலியுறுத்தல்

உள்ளகரம், பெருங்குடி மண்டல குழு கூட்டம், தலைவர் ரவிச்சந்திரன் தலைமையில், நேற்று நடந்தது. மண்டல உதவி கமிஷனர் - பொறுப்பு, முரளி மற்றும் அலுவலர்கள் பங்கேற்றனர்.கூட்டத்தில் கவுன்சிலர்கள் பேசியதாவது:ஷெர்லி, 187வது வார்டு தி.மு.க., கவுன்சிலர்: அய்யப்பன் நகரில், மின் கம்பிகள் தாழ்வாக தொங்குகின்றன. சபரி சாலை மின்மாற்றியை திறன் உயர்த்த வேண்டும். ஏரிக்கரை நடைபாதையில் உள்ள கடைகளை அப்புறப்படுத்த வேண்டும்.சபீனா, 188வது வார்டு தி.மு.க., கவுன்சிலர்: வார்டு முழுதும் சேதமடைந்துள்ள மின் கம்பங்களை மாற்ற வேண்டும். விஜயநகரில் இருந்து கீழ்க்கட்டளைக்கு, எங்கள் வார்டு வழித்தடத்தில் சிற்றுந்து இயக்க வேண்டும்.லட்சுமி, 191வது வார்டு அ.தி.மு.க., கவுன்சிலர்: காந்தி தெரு, வீராத்தம்மன் கோவில் தெருவில், மழைக் காலத்திற்குள் வடிகால்வாய்களை சீரமைக்க வேண்டும். வார்டில் நிலவும் குடிநீர் பிரச்னைக்கு தீர்வு காண வேண்டும்.விஸ்வநாதன், 181வது வார்டு தி.மு.க., கவுன்சிலர்: கோடைக்காலம் என்றாலும், பகிங்ஹாம் கால்வாய் பகுதியில், கொசு மருந்து தெளிப்பதை முறையாக செயல்படுத்த வேண்டும்.தமிழரசி, 182வது வார்டு தி.மு.க., கவுன்சிலர்: பாதாள சாக்கடை, மழைநீர் வடிகால்வாய் பணிகளை துரிதப்படுத்த வேண்டும். வார்டில் உள்ள இறகுப்பந்து திறந்தவெளி அரங்கை உள் விளையாட்டு அரங்காக மாற்ற வேண்டும்.சர்மிளா, 185வது வார்டு தி.மு.க., கவுன்சிலர்: திறந்த நிலையில் உள்ள வடிகால்வாய்களை, மூடுகால்வாயாக மாற்ற வேண்டும். உள்ளகரம், சுவாமிநகரில் சுகாதாரமான குடிநீர் வழங்க நடவடிக்கை எடுக்க வேண்டும்.இவ்வாறு கவுன்சிலர்கள் பேசினர்.அதற்கு, மண்டல குழு தலைவர் ரவிச்சந்திரன் பதிலளைத்து பேசியதாவது:பெருங்குடி மண்டலத்தில், மக்களுக்கு தேவையான அனைத்து அடிப்படை வசதிகளும் உடனுக்குடன் மேற்கொள்ளப்படுகின்றன.வார்டு கவுன்சிலர்களும் மக்கள் தேவையை கேட்டறிந்து, அதிகாரி, அலுவலர்களுடன் இணைந்து நிறைவேற்றித் தரவேண்டும்.இவ்வாறு அவர் பேசினார்.