சமாளிக்க கூலா வாங்கலாம் ஒரு ஏ.சி.,!

கோவை : வெயில் தாக்கம் நாளுக்கு நாள், அதிகரித்து வருகிறது. வெயிலின் வெப்பத்தை சமாளிக்க, மின்விசிறி, ஏர் கூலர்கள் என எத்தனை வந்தாலும், இன்று எல்லோருடைய ஓட்டும் ஏ.சி.,க்குதான். அத்தனை வெப்பம்! முன்எப்போதையும் விட இந்தாண்டு ஏ.சி., விற்பனை இரு மடங்கு உயர்ந்துள்ளது.சரி, ஒரு ஏ.சி., வாங்கும் முன் என்னென்ன கவனிக்க வேண்டும் என்று, மெக்கானிக் அருள்குமாரிடம் கேட்டோம். பிரித்து மேய்ந்து விட்டார் மனுஷன்!

ஏ.சி., வாங்கும் முன்...!

ஏ.சி.,களில், 'விண்டோ', 'ஸ்பிளிட்' என இரு வகைகள் உள்ளன. ஸ்பிளிட் ஏசிகளுடன் ஒப்பிடும் போது, விண்டோ வகை மலிவானவை. பொருத்துவதும் எளிது.ஆனால், ஸ்பிளிட் ஏ.சி., கள் சத்தம் குறைவு, அதிக குளிரூட்டும் திறனால் அதிகம் விரும்பப்படுகின்றன. குறிப்பாக, இவற்றின் பராமரிப்பு மிகவும் எளிது. இன்வெர்ட்டர் அல்லாத மற்றும் இன்வெர்ட்டர் ஸ்பிளிட் ஏ.சி., என இருவகைகள் உள்ளன. இன்வெர்ட்டர் ஏ.சி., குளிர் திறன் அதிகமாகவும், மற்றும் மின் நுகர்வு குறைவாகவும் இருக்கும்.

கூலிங் திறன் முக்கியம்

ஏ.சி.,கள் நான்கு வெவ்வேறு அளவுகளில்(குளிரூட்டும் திறனின் அடிப்படையில்) கிடைக்கின்றன. ஒரு ஆரம்ப கட்ட நிலை ஏ.சி., 0.8- டன் குளிரூட்டும் திறனைக் கொண்டிருக்கும், இது, 2 டன்கள் வரை செல்லும்.

எந்த அறைக்கு எந்த ஏ.சி.,

அறையின் அளவை பொறுத்து, எத்தனை டன் ஏ.சி., வேண்டும் என்பதை உறுதி செய்வது நல்லது. 100 - 120 சதுர அடி அறைக்கு, 1 டன், 120 - 180 சதுர அடி அறைக்கு, 1.5 டன் ஏ.சி., 180 - 240 சதுர அடி அறைக்கு, 2 டன் ஏ.சி., பொருந்தும். மின்சாரத்தை மிச்சப்படுத்த டெம்பரேச்சரை 24 என்ற அளவில் வைப்பதே சரியானது

பராமரிப்பு முக்கியம்

ஏ.சி., நன்றாக இயங்கினாலும், ஆண்டுக்கு ஒருமுறை சர்வீஸ் செய்ய வேண்டும். மூன்று மாதத்துக்கு ஒரு முறை, ஏ.சி., யின் காற்று வடிகட்டியை சுத்தப்படுத்துவது அவசியம். சரியான கால இடைவெளியில் ஏ.சி., பழுது பார்ப்பது, தேவையற்ற செலவுகள் ஏற்படுவதைத் தடுக்கும். ஏ.சி., பயன்படுத்தும் அறையில், இரும்பால் செய்யப்பட்ட பொருட்களைத் தவிர்ப்பது நல்லது. தண்ணீர் வடியும் குழாயை, சரியான முறையில் வடிகாலோடு இணைக்க வேண்டும். வடிகுழாய் மேலும், கீழுமாக இருந்தால், தண்ணீர் சரியாக வெளியேறாமல் மீண்டும் ஏ.சி.,க்கே வந்து, அறைக்குள் சொட்டும் வாய்ப்பு ஏற்படும். இவ்வாறு, கூறி முடித்தார் மெக்கானிக் அருள்குமார்.

சீலிங் பேன் வாங்கும் முன்...

l சீலிங் பேன் பொருத்த விரும்பும் அறையின் நீளம், அகலம் மற்றும் உயரத்தை அளவிடவும். l உங்கள் அறையின் கூரை மிக உயரமானது என்றால், நீளமாக தொங்கக்கூடிய மின்விசிறியை பரிசீலிக்கலாம். * ஒரு பெரிய அறைக்கு, சிறந்த காற்றோட்டத்திற்கு இரண்டு மின்விசிறிகள் தேவைப்படும்.l பிளேடுகளின் எண்ணிக்கையைப் பொறுத்தவரை, உங்கள் விருப்பப்படி நீங்கள் தேர்வு செய்யலாம். ஏனெனில் மூன்று -பிளேடு விசிறியும், ஐந்து- பிளேடு விசிறியைப் போலவே தான் செயல்படும். l மின்விசிறியைத் தேர்ந்தெடுக்கும்போது, அது எவ்வளவு ஆற்றல் திறன் வாய்ந்தது என்பதைக் கவனியுங்கள். இதனால் உங்கள் மின் கட்டணத்தைச் சேமிக்க முடியும்.

பி.இ.இ., ஸ்டார் ரேட்டிங்

''இந்தியாவில் விற்கப்படும் ஏ.சி.,கள் அனைத்தும் பி.இ.இ., (பீரோ ஆப் எனர்ஜி எபீயன்சி) மதிப்பீட்டில் வருகின்றன. இரண்டு அல்லது மூன்று நட்சத்திர மதிப்பீடுகளைக் கொண்ட ஏ.சி.,யை விட, 5 -நட்சத்திர மதிப்பீட்டைக் கொண்ட ஏ.சி., யின் செயல் திறன் நன்றாக இருக்கும். பல வகை ஏ.சி., கூலிங் திறன், பி.இ.இ., ஸ்டார் ரேட்டிங், மின்சார செலவு உள்ளிட்ட முக்கிய விஷயங்களை, ஏ.சி., வாங்கும் முன் கட்டாயம் பார்க்க வேண்டும். நீங்கள் தினமும், 8 மணி நேரத்துக்கு குறைவாக மட்டுமே ஏ.சி., பயன்படுத்துபவராக இருந்தால், 3 ஸ்டார் ஏ.சி.,யே போதும். ஏ.சி.,யின் இதயம் கம்ப்ரெஸ்ஸர். கம்ப்ரெஸ்ஸருக்கு, அதிக வருட வாரன்டி தரும் பிராண்டுகளை, தேர்ந்தெடுப்பது முக்கியம்,'' என்கிறார் அருள்குமார்.

எந்த அறைக்கு ஏர்கூலர் சரி?

சிறிய மற்றும் நடுத்தர அளவிலான அறைகளுக்கு, பெர்சனல் கூலர்களை தேர்வு செய்யலாம். பெரிய அறைகளுக்கு, டெசர்ட் கூலர்கள் ஒரு சிறந்த தேர்வாக இருக்கும். 150 - 300 சதுர அடி வரை உள்ள அறையில், பெர்சனல் கூலர்களை வைக்கலாம்; 300 சதுர அடிக்கு மேல் உள்ள அறைக்கு, டெசர்ட் கூலர்கள் சிறந்தவை.

தொட்டியின் திறன்

ஏர் கூலர்களில் தண்ணீர் தொட்டி திறன் முக்கியம். கூலர்களின் அளவு எவ்வளவு பெரிதாக இருக்கிறதோ, அதே அளவுக்கு தொட்டியின் திறனும் இருக்க வேண்டும். சிறிய அறைகளுக்கு, 15 லிட்டர், நடுத்தர அளவிலான அறைகளுக்கு, 25 லிட்டர், பெரிய அறைகளுக்கு, 40 லிட்டர் மற்றும் அதற்கு மேல் தொட்டியின் திறன் கொண்ட, ஏர் கூலரை தேர்வு செய்ய வேண்டும்.