ஒரு கிலோ முருங்கை 430 ரூபாய்!

கோவை: மழைக்காலம் என்பதால், கோவை சந்தைகளில் வரத்து குறைந்து முருங்கை மற்றும் தக்காளி விலை அதிகரித்து காணப்பட்டது. கோவை சந்தைக்கு, கர்நாடகா, தமிழக மாவட்டங்கள், ஓசூர், மைசூர், ஆக்ரா, மகராஷ்டிரா உள்ளிட்ட பல்வேறு பகுதிகளில் இருந்து காய்கறி வரத்து உள்ளன. வழக்கமாக, 1000 டன் காய்கறி வரத்து உள்ள இடத்தில், 400 டன் மட்டுமே வரத்து உள்ளதாக, வியாபாரிகள் கூறுகின்றனர். குறிப்பாக, முருங்கை வரத்து குறைந்து ஒரு கிலோ, 430 ரூபாய் வரை நேற்று விற்பனையானது. ஒரு முருங்கை 15 முதல் 20 ரூபாய் வரை, கடைகளில் விற்பனை செய்யப்பட்டது. தியாகி குமரன் மார்க்கெட் மொத்த காய்கறி வியாபாரிகள் சங்கத்தின் தலைவர் ராஜேந்திரன் கூறுகையில், ''வழக்கமாக, நவ., டிச., மாதம் மழைக்காலம் என்பதால், காய்கறி விலை சற்று அதிகரித்து காணப்படுவது வழக்கம். ''முருங்கை, தக்காளி உற்பத்தி குறைவால், விலை மிகவும் அதிகமாக உள்ளது. பிற காய்கறிகளில் சிறிது விலையேற்றம் உள்ளது. முருங்கை ஒரு கிலோ, 430 ரூபாய் வரை நேற்று விற்பனையானது. மழைக்காலம் முடிந்து புதிய வரத்து துவங்கும் போது விலை சீராகும்,'' என்றார்.

பாலம் கட்டுமான பணியால் காய்கறி வியாபாரிகள் பாதிப்பு

கோவை சந்தைக்கு வழக்கமாக, 1000 டன் காய்கறி வரத்து இருக்கும். தற்போது, சாய்பாபாகாலனி பகுதியில் மேம்பாலம் கட்டும் பணிகள் நடப்பதால், கனரக வாகனங்கள் அனுமதிக்கப்படுவதில்லை. அவ்வாறு வந்தாலும், போக்குவரத்து நெரிசல் காரணமாக நீண்ட நேரம் காத்திருக்கும் சூழல் உள்ளது. இதனால், கேரளா உள்ளிட்ட பிற மாநிலங்களுக்கு காய்கறி அனுப்ப முடிவதில்லை. இதனால், பிற மாநிலங்களில் இருந்து கொள்முதலும் குறைந்து தற்போது, 400 டன் காய்கறி மட்டுமே வரத்து உள்ளது. இதில், 70 சதவீதம் கோவை மக்களுக்கே போதுமானதாக இருக்கும். பாலம் கட்டுமான பணியால் கடுமையாக பாதிக்கப்பட்டுள்ளதாக, வியாபாரிகள் தெரிவித்தனர்.

காய்கறி மொத்த விலை நிலவரம் (கிலோவில்)

கத்தரி - ரூ.30 வெண்டை - ரூ.30 பீர்க்கங்காய் - ரூ.40 புடலை - ரூ.40 பாகற்காய் - ரூ.30 அவரை - ரூ.50 அரசாணிக்காய் - ரூ.8 உருளைகிழங்கு - ரூ.20 பெ.வெங்காயம் - ரூ.18 சின்னவெங்காயம் - ரூ.40 தக்காளி - ரூ.64 இஞ்சி - ரூ.60 பீன்ஸ் - ரூ.50 பீட்ரூட் - ரூ.30 கேரட் - ரூ.40 காலிபிளவர் - ரூ.40