டேட்டிங் செயலி பயன்படுத்துவோர் ஜாக்கிரதை உங்கள் நகையும், பணமும் குறியாக இருக்கலாம்

கோவை: டேட்டிங்கில் ஆர்வமுள்ளவர்களுக்காக டிண்டர், பம்பிள், ஹிங்கே உள்ளிட்ட பல்வேறு டேட்டிங் செயலிகள் உள்ளன. கோவையில் சமீபகாலமாக இச்செயலிகள் மூலம் நடக்கும் குற்றச்சம்பவங்கள் அதிகரித்து வருகின்றன. சமீபத்தில் பெண் ஒருவரிடம், டேட்டிங் செயலி மூலம் பழகிய வாலிபர் ஒருவர், அவரை தனியாக அழைத்துச் சென்று பணம், நகைகளை பறித்தார். இதுபோன்ற பல சம்பவங்கள் நடந்தாலும், ஒரு சில மட்டுமே வெளி உலகுக்கு தெரிய வருகிறது. பலர் வெளியில் சொல்வதில்லை. ஒரு சில மோசடி நபர்கள், இதற்கென பெண்களை நியமித்து, டேட்டிங் ஆப் மூலம் வலைவிரித்து, மோசடியில் ஈடுபட்டு வருகின்றனர். டேட்டிங் செயலிகள் மூலம் இளம்பெண்கள், இளைஞர்களிடம் நடக்கும், பணம், நகைப்பறிப்பை தடுக்க, விழிப்புடன் இருக்குமாறு போலீசார் எச்சரித்துள்ளனர். போலீஸ் உயர் அதிகாரி ஒருவர் கூறியதாவது: டேட்டிங் செயலிகள் மூலம் பழக்கம் ஏற்பட்டு, இரவில் 'பப்'க்கு செல்லத் துவங்குகின்றனர். குறிப்பாக, வெளியூர்களில் இருந்து வரும் இளைஞர்கள், பெண்கள்தான் இந்த செயலிகளை அதிகளவில் பயன்படுத்துகின்றனர். குற்றச்செயல்களில் ஈடுபடும் கும்பலை சேர்ந்த சிலர், இந்த டேட்டிங் செயலிகளை பணம், நகை பறிப்புக்கு பயன்படுத்திக் கொள்கின்றனர். கடந்த சில ஆண்டுகளாக, 'கிரிண்டர்' செயலி மூலம் இளைஞர்களிடம் பணம் பறிக்கும் சம்பவங்கள் நடந்து வருகின்றன. எந்த ஒரு டேட்டிங் செயலியாக இருந்தாலும், அதில் இருக்கும் நபர்களின் முழு விவரங்களும், உண்மையானதா என்பதை அறிந்து கொள்ள வேண்டும். வெளியூர்களில் இருந்து இங்கு படிக்க வந்துள்ள பிள்ளைகளின் பெற்றோர், கவனமுடன் இருக்க வேண்டும். அடிக்கடி பிள்ளைகள் தங்கியுள்ள இடத்துக்கு வந்து, பார்த்து செல்ல வேண்டும். குறைந்தபட்சம், அவர்கள் எங்கு உள்ளனர் என்பதை கேட்டறிய வேண்டும். இரவு நேர பப்களில், போதைப் பொருட்கள் பயன்பாடு குறித்து கண்காணிக்கப்படுகிறது. இரவு விடுதிகளையும் கண்காணிக்க அறிவுறுத்தப்பட்டுள்ளது. போதைப் பொருட்கள் பயன்படுத்தினால், அவர்கள் மீது கடும் நடவடிக்கை எடுக்கவும் உத்தரவிடப்பட்டுள்ளது. இவ்வாறு, அவர் கூறினார்.