ஜூனியர் கபடி சாம்பியன்ஷிப் :கற்பகம் பல்கலை வீரர்கள் அசத்தல்

கோவை: தமிழ்நாடு அமெச்சூர் கபடி சங்கம் சார்பில், 51வது ஜூனியர் ஆண்களுக்கான கபடி போட்டி, கிருஷ்ணகிரி மாவட்டத்தில் மூன்று நாட்கள் நடந்தது. இதில், 38 மாவட்டங்களில் இருந்து, 100க்கும் மேற்பட்ட அணிகள் பங்கேற்றன. கற்பகம் பல்கலையை சேர்ந்த, 20 மாணவர்கள் அந்தந்த மாவட்டங்களை அடையாளமாக கொண்டு விளையாடினர். இதில், முதலாம் ஆண்டு சிவில் மாணவர் இளம்பிரை விளையாடிய ராமநாதபுரம் மாவட்டம் அணி முதலிடத்தையும், பி.எஸ்.சி., ஏ.ஐ.டி.எஸ்., முதலாம் ஆண்டு மாணவர் சிவனேஷ் விளையாடிய, திருவாரூர் மாவட்ட அணி இரண்டாம் இடத்தையும், பி.காம்., சி.ஏ., மாணவர் ரபேல் விளையாடிய தென்காசி மாவட்ட அணி மூன்றாம் இடத்தையும் வென்றன. வெற்றி பெற்ற வீரர்கள் மற்றும் பயிற்சியாளர்கள் கோவிந்தராஜ், தங்கவேல் ஆகியோரை, கற்பகம் பல்கலை துணைவேந்தர் ரவி, பதிவாளர் பிரதீப், உடற்கல்வி துறை இயக்குனர் சுதாகர் உள்ளிட்டோர் பாராட்டினர்.