ராமலிங்கம் செட்டியார் பள்ளி கிரிக்கெட்டில் அபார வெற்றி

கோவை:பள்ளி மாணவர்களுக்கு மாவட்ட அளவிலான கிரிக்கெட் போட்டியில், ராமலிங்கம் செட்டியார் மேல்நிலைப்பள்ளி அணி, 226 ரன்கள் வித்தியாசத்தில் அபார வெற்றி பெற்றது. ராமலிங்கம் செட்டியார் பள்ளி சார்பில், 27ம் ஆண்டு 'ராமலிங்கம் செட்டியார் நினைவு கோப்பைக்கான' மாவட்ட அளவிலான கிரிக்கெட் போட்டி, கோவையில் நடக்கிறது. இதில், 16 பள்ளி அணிகள் பங்கேற்றுள்ளன. நாக் அவுட் சுற்றுப்போட்டியில், ராமலிங்கம் செட்டியார் பள்ளி மற்றும் அங்கப்பா பள்ளி அணிகள் மோதின.முதலில் பேட்டிங் செய்த ராமலிங்கம் செட்டியார் பள்ளி அணி, 20 ஓவர்களில் ஆறு விக்கெட் இழப்புக்கு 254 ரன்கள் குவித்தது.அணியின் கேப்டன் ரஞ்சித் குமார் (84) அபாரமாக விளையாடினார். கோகுல கண்ணன் (53*) அரை சதம் விளாசினார். அங்கப்பா பள்ளியின் கிருத்திக், மூன்று விக்கெட் கைப்பற்றினார். அடுத்து விளையாடிய அங்கப்பா பள்ளி அணி, 13.1 ஓவர்களில் 28 ரன்களுக்கு ஆல் அவுட்டானது. ராமலிங்கம் செட்டியார் அணியின் பிரணவ், நான்கு விக்கெட் மற்றும் பிரனேஷ் மூன்று விக்கெட் கைப்பற்றி, அணியின் வெற்றிக்கு உதவினார்.