லீக் நுழைவு நாக்-அவுட் போட்டி சூப்பர் ஸ்டார் அணிக்கு வெற்றி

கோவை: கோவை மாவட்ட கிரிக்கெட் சங்கம்(சி.டி.சி.ஏ.,) சார்பில், லீக் நுழைவுக்கான 'நாக்-அவுட்' போட்டிகள் எஸ்.என்.எம்.வி., உள்ளிட்ட மைதானங்களில் நடந்து வருகின்றன. கோவை ராக்கர்ஸ் அணியும், சூப்பர் ஸ்டார் கிரிக்கெட் கிளப் அணியும் மோதின. கோவை ராக்கர்ஸ் அணியினர், 19.4 ஓவரில் அனைத்து விக்கெட்களையும் இழந்து, 81 ரன் எடுத்தனர். எதிரணி வீரர்களான கலைவாணன் நான்கு விக்கெட், அரவிந்த் மூன்று விக்கெட் வீழ்த்தினார். சூப்பர் ஸ்டார் கிரிக்கெட் கிளப் அணியினர், 15.3 ஓவரில் இரு விக்கெட் இழப்புக்கு, 82 ரன் எடுத்து வெற்றி பெற்றனர். வீரர் கிறிஸ் மார்சல், 50 ரன் விளாசினார். அடுத்து, சி.ஐ.எஸ்.கே.ஏ., கிரிக்கெட் கிளப் அணியும், காளையன்ஸ் சி.ஏ., அணியும் மோதின. சி.ஐ.எஸ்.கே.ஏ., கிரிக்கெட் கிளப் அணியினர், 22.4 ஓவரில் அனைத்து விக்கெட்களையும் இழந்து, 118 ரன் எடுத்தனர். வீரர் யோசுவா, 36 ரன் எடுத்தார். எதிரணி வீரர் சதீஷ் ஐந்து விக்கெட் வீழ்த்தினார். காளையன்ஸ் அணியினரோ, 22.4 ஓவரில் ஆறு விக்கெட் இழப்புக்கு, 122 ரன் எடுத்து வெற்றிபெற்றனர். வீரர் சுரேந்திரநாகர் மூன்று விக்கெட் வீழ்த்தினார். தொடர்ந்து போட்டிகள் நடக்கின்றன.