இரண்டு நாடுகளின் விடுதலையை பார்த்த மக்களின் அழகான கதை

வா சகர்கள் வாசிக்க வேண்டிய புத்தகங்கள் குறித்து, வாசித்தவர்கள் வாசித்த புத்தகங்களில் இருந்து, தங்களின் வாசிப்பு அனுபவங்களை, இங்கு பகிர்ந்து கொள்கின்றனர். வங்க மொழி நாவலாசிரியர் அதீன் பந்த்யோபாத்யாய எழுதிய, 'நீலகண்டப் பறவையைத் தேடி'என்ற வங்க மொழி நாவலை, சு.கிருஷ்ண மூர்த்தி தமிழில் மொழி பெயர்த்துள்ளார். இந்த நாவல் குறித்து கல்லுாரி பேராசிரியர் துரைமுருகன், தனது வாசிப்பு அனுபவங்களை பகிர்ந்து கொண்டார். அவர் கூறியதிலிருந்து: எழுத்தாளர் வண்ணதாசன் ஒரு பேட்டியில், நீங்கள் ஏன் நாவல் எழுதவில்லை என்ற கேள்விக்கு, அவர் அளித்த பதிலில், 'நாவல் எழுதினால், வங்கமொழி நாவலாசிரியர் அதீன் பந்த்யோபாத்யாய எழுதிய 'நீலகண்டப் பறவையைத் தேடி' என்ற நாவலைப்போல் எழுதவேண்டும்' என்று கூறியிருந்தார். இந்த நாவல், 1925 முதல் 1945 வரையிலான கால கட்டத்தில், நடந்த சம்பவங்களை மையமாக வைத்து எழுதப்பட்டுள்ளது. வங்காளத்தில் நாராயண் கன்ச் மாவட்டத்தில் உள்ள, தோடர் மாக் என்ற ஒரு சிறிய கிராமத்தில் இருந்து நாவல் துவங்குகிறது. இந்த எழுத்தாளர், பிரிக்கப்படாத வங்க தேச கிராமத்தில் பிறந்து வளர்ந்தவர். இயற்கையை புரிந்து கொள்ள முயற்சி செய்தால் மட்டுமே மனிதர்களையும், உலகத்தையும் வேறுபாடு இன்றி நேசிக்க முடியும் என்பதை நாவல் சொல்கிறது. இந்தியா, பாகிஸ்தான் பிரிவினை பேச்சு துவங்கி, தீவிரமடைந்த காலம்.இந்த பிரச்னையால், ஒன்றாக இணைந்து வாழ்ந்து வந்த இந்துக்களும், இஸ்லாமியர்களும் எப்படி பாதிக்கப்படுகின்றனர், என்பதை நேரடி சாட்சியமாக, இந்த நாவல் சொல்கிறது. பிரிவினை கட்டாயம் என்ற சூழ்நிலை வரும் போது, இந்து, இஸ்லாமிய மக்களிடம் இருந்த நட்பும், உறவும் பலவந்தமாக பிரிக்கப்படுகிறது. இதை அந்த பகுதியில் வாழ்ந்த மக்கள் விரும்பவில்லை. பல சமூகத்தினர், பல மதங்களை பின் பற்றுபவர்கள், பலவிதமான நம்பிக்கைகள் உள்ள மக்கள் வாழும் நாட்டில், ஒருவரை ஒருவர் எப்படி புரிந்து கொண்டு, வாழ வேண்டும், பழக வேண்டும் என்பது, இந்த நாவலில் அழகாக சொல்லப்பட்டு இருக்கிறது. முக்கியமாக, இயற்கையை பற்றி அற்புதமாக சொல்லப்பட்டுள்ளது. மனிதர்களை தவிர வேறு எந்த ஒரு உயிரினத்திற்கும் வேறுபாடு தெரியாது. அவை எதையும் வேறுபடுத்துவதில்லை என்பதை, நுட்பமாக சொல்லக்கூடிய நாவல்.