பீன்ஸ் விலை கடும் சரிவு; கிலோ ரூ.10க்கு விற்பனை

ஒட்டன்சத்திரம் : வரத்து அதிகரிப்பால் ஒட்டன்சத்திரம் மார்க்கெட்டில் பீன்ஸ் விலை, 10 நாட்களில், 30 ரூபாயில் இருந்து, 10 ரூபாயாக சரிந்தது.திண்டுக்கல் மாவட்டம், ஒட்டன்சத்திரம் மற்றும் மலைப்பகுதி கிராமங்களான வடகாடு, கண்ணனுார், கோம்பைபட்டி, பெத்தேல்புரம் சுற்றுப்பகுதிகளில் பீன்ஸ் அதிகமாக விளைவிக்கப்படுகிறது. பத்து நாட்களுக்கு முன் வரை, அறுவடை குறைவாக இருந்ததால் மார்க்கெட்டிற்கு வரத்து குறைந்து கிலோ, 30 ரூபாய்க்கு விற்பனையானது. இந்த வாரம் பல இடங்களில் அறுவடை நடந்து வருவதால், மார்க்கெட்டிற்கு பீன்ஸ் வரத்து அதிகரித்தது. இதனால் விலை சரிவடைந்து கிலோ, 10 ரூபாய்க்கு விற்பனை ஆனது. வரும் நாட்களில் வரத்தின் அடிப்படையில் விலையில் மாற்றம் இருக்கும் என, வியாபாரிகள் தெரிவித்தனர்.