பயணியர் நிழற்குடை அமைக்க வலியுறுத்தல்

உத்திரமேரூர்:வாடாதவூரில் பயணியர் நிழற்குடை அமைக்க கிராம மக்கள் வலியுறுத்தி உள்ளனர். உத்திரமேரூர் ஒன்றியம், வாடாதவூர் கிராமத்தில் 2,000க்கும் மேற்பட்ட மக்கள் வசித்து வருகின்றனர். இந்த கிராம மக்கள் திருப்புலிவனம் -- சாலவாக்கம் சாலையில் உள்ள பேருந்து நிறுத்தத்திற்கு சென்று பேருந்து ஏறி செல்கின்றனர். இப்பேருந்து நிறுத்தத்தில் பயணியர் நிழற்குடை இல்லை. இதனால், கிராம மக்கள், மாணவ - மாணவியர் நீண்ட நேரம் காத்திருந்து பேருந்து பிடித்து செல்கின்றனர். மழை மற்றும் வெயில் நேரங்களில் பயணியர் சிரமத்திற்கு உள்ளாகி வருகின்றனர். எனவே, வாடாதவூரில் பயணியர் நிழற்குடை அமைக்க, ஊரக வளர்ச்சி துறையினர் நடவடிக்கை எடுக்க வேண்டுமென, கிராம மக்கள் வலியுறுத்தி வருகின்றனர்.