காஞ்சிக்கு பன்னோக்கு உயர் சிகிச்சை மருத்துவமனை வாக்குறுதி ஏமாற்று வேலை; தி.மு.க., ஆட்சி நான்கரை ஆண்டாகியும் வராததால் மக்கள் கடுப்பு

காஞ்சிபுரம்: காஞ்சிபுரம் மாவட்ட அரசு தலைமை மருத்துவமனையை பன்னோக்கு உயர் சிகிச்சை மருத்துவமனையாக தரம் உயர்த்தவதாக, தேர்தல் வாக்குறுதியளித்து ஆட்சியை பிடித்த தி.மு.க., நான்கரை ஆண்டாகியும் அறிவிப்புகூட வெளியிடாததால், மக்கள் கடுப்பில் உள்ளனர். மருத்துவமனை மேம்படாததால், விபத்து மற்றும் தீக்காய தீவிர சிகிச்சை உள்ளிட்டவற்றுக்கு, செங்கல்பட்டு மற்றும் சென்னையில் உள்ள மருத்துவமனைக்கு அலைய வேண்டியிருப்பதாக, நகர மக்கள் மற்றும் நோயாளிகள் கவலை தெரிவிக்கின்றனர். காஞ்சிபுரத்தில் செயல்படும் மாவட்ட அரசு தலைமை மருத்துவமனை, ஆங்கிலேயர் ஆட்சியின்போது துவங்கப்பட்டு, 100 ஆண்டுகளுக்கு மேலாக இயங்கி வருகிறது. ஒவ்வொரு காலக்கட்டத்திலும் மருத்துவ சிகிச்சை முறைகளிலும், வசதிகளிலும் மேம்படுத்தப்பட்டதால், காஞ்சிபுரம் நகர்ப்புறம் மட்டுமின்றி, திருவண்ணாமலை, ராணிப்பேட்டை மாவட்டங்களைச் சேர்ந்த மக்களும், இம்மருத்துவமனையை தேடி வந்து சிகிச்சை பெற்று செல்கின்றனர். தினம் 3,000க்கும் மேற்பட்டோர் புறநேயாயாளிகளாக வந்து செல்கின்றனர். 750 படுக்கை வசதிகளுடன் குழந்தைகளுக்கான சிகிச்சை, பிரசவம் என, பல்வேறு சிகிச்சைகள் வழங்கப்படுகின்றன. இருப்பினும், சில முக்கிய சிகிச்சைகளும், வசதிகளும் இன்னமும் முழுமையாக கிடைக்கவில்லை. உயர் சிகிச்சைகளுக்கு சென்னை, செங்கல்பட்டு போன்ற மாவட்டங்களுக்கு அலைய வேண்டியிருப்பதால், காஞ்சிபுரம் அரசு மருத்துவமனையை மேம்படுத்த வேண்டும் அல்லது மருத்துவக் கல்லுாரி துவங்க வேண்டும் என நோயாளிகளும், நகரவாசிகளும் கோரிக்கை விடுத்து வருகின்றனர். இந்நிலையில், கடந்த 2021ல் தி.மு.க.,வின் தேர்தல் அறிக்கையில், 'ஆட்சிக்கு வந்ததும், காஞ்சிபுரம் மாவட்ட அரசு தலைமை மருத்துவமனையை, பன்னோக்கு வசதி உடைய உயர் சிகிச்சை மருத்துவமனையாக மாற்றுவோம்' என, வாக்குறுதியில் தெரிவித்தனர். ஆட்சிக்கு வந்து ஐந்து ஆண்டுகள் நிறைவு பெறவுள்ள நிலையில், இதுவரை பன்னோக்கு வசதி உடைய மருத்துவமனையாக, காஞ்சிபுரம் அரசு மருத்துவமனையை மாற்ற முடியவில்லை. ஒவ்வொரு நாளும் உயர் சிகிச்சை தேவைப்படும் நோயாளிகளும், விபத்தில் சிக்குவோரும், செங்கல்பட்டு அல்லது சென்னை ராஜிவ்காந்தி அரசு மருத்துவக் கல்லுாரி மருத்துவமனைக்கு பரிந்துரை செய்யப்படுவது வாடிக்கையாகி வருகிறது. விபத்து மற்றும் உயர் சிகிச்சைக்கு தேவையான வசதிகள் இன்னும் இங்கு ஏற்படுத்தவே இல்லை. இது மட்டுமல்லாமல், முக்கிய உறுப்புகளுக்கு சிகிச்சை வழங்க டாக்டர்கள் இல்லாமலும், பணியாளர்கள் பற்றாக்குறையாலும் நோயாளிகள் சிரமப்படுகின்றனர். சில பிரிவுகளுக்கு நோயாளிகள் உள்நோயாளிகளாக சிகிச்சை பெற, வார்டுகள் கூட இல்லை; உட்கட்டமைப்பு வசதிகளும் சரியான முறையில் இல்லை. தி.மு.க., ஆட்சி முடிவதற்குள் இம்மருத்துவமனை மேம்படுத்தப்படும் என எதிர்பார்க்கப்பட்ட நிலையில், இதுவரை அதற்கான அறிவிப்பு வெளியிடாதது, நகரவாசிகள் இடையே அதிருப்தியை ஏற்படுத்தி உள்ளது. காஞ்சிபுரம் மாவட்டத்திற்கு மருத்துவக் கல்லுாரி அமைவதற்கு மத்திய அரசு அனுமதி தரவில்லை என, மத்திய அரசை குற்றஞ்சாட்டி வீடியோ வெளியிட்ட காஞ்சிபுரம் தி.மு.க., - எம்.எல்.ஏ., எழிலரசன், காஞ்சிபுரம் அரசு மருத்துவமனை பற்றிய தேர்தல் வாக்குறுதிக்கு என்ன சொல்ல போகிறார் என, பொதுமக்கள் கேள்வி எழுப்பியுள்ளனர். தீக்காயம், விபத்து, உயர் பரிசோதனைகள், உறுப்புகளுக்கான உயர் சிகிச்சைகள், சிக்கலான பிரசவங்கள், உயர் அறுவை சிகிச்சை முறைகள், நரம்பு சம்பந்தமான அறுவை சிகிச்சைகள் என பல வகை சிகிச்சைகளுக்கு சென்னைக்கும், செங்கல்பட்டுக்கும் இன்று வரை அலைந்து கொண்டிருப்பதாக பொதுமக்கள் நொந்து கொள்கின்றனர். காஞ்சிபுரம் அரசு மருத்துவமனையில் சிகிச்சை முறைகளில் நீடிக்கும் சிக்கல் ★ இதயம், சிறுநீரகம், சிறுநீரக அறுவை சிகிச்சை ஆகிய துறைகளுக்கு ரெகுலர் மருத்துவர் இதுவரை இல்லை ★ தீக்காய சிகிச்சைக்கு தீவிர சிகிச்சை பிரிவு இல்லை. அதனால், கீழ்ப்பாக்கம் அரசு மருத்துவக் கல்லுாரிக்கு பரிந்துரை செய்ய வேண்டியுள்ளது ★ மருத்துவமனையில் வாகனங்கள் நிறுத்தும் வசதி இல்லாததால், கார், டூ - வீலர் உள்ளிட்ட வாகனங்களை சாலையிலேயே நிறுத்த வேண்டியுள்ளது ★ மருத்துவர்கள், பணியாளர்கள், செவிலியர்கள் பற்றாக்குறை நீடிக்கிறது ★ சிக்கலான பிரசவத்தின்போது கர்ப்பிணியர், செங்கல்பட்டு அரசு மருத்துவக் கல்லுாரிக்கு பரிந்துரை செய்யப்படுகின்றனர் ★ விபத்தில் சிக்கி பலத்த காயமடைவோர், சென்னை ராஜிவ்காந்தி அரசு மருத்துவக் கல்லுாரிக்கு பரிந்துரை செய்யப்படுகின்றனர் ★ சிறுநீரக அறுவை சிகிச்சை, நுரையீரல், சிறுநீரகம் என முக்கிய உறுப்புகளுக்கு தனி வார்டுகள் இல்லை உள்ளிட்ட பிரச்னைகள் மற்றும் சிக்கல்கள், காஞ்சிபுரம் மாவட்ட தலைமை மருத்துவமனையில் உள்ளன.