முட்டை விலை 20 காசு சரிவு

நாமக்கல், :நாமக்கல்லில், தேசிய முட்டை ஒருங்கிணைப்புக்குழு கூட்டம், நேற்று நடந்தது. அதில், முட்டை உற்பத்தி, மார்க்கெட்டிங் நிலவரம் குறித்து பண்ணையாளர்கள் விவாதித்தனர். இதையடுத்து, 555 காசுக்கு விற்ற முட்டை விலை, 20 காசு குறைத்து, 535 காசாக நிர்ணயம் செய்யப்பட்டது. வடமாநிலங்களில், நாளை முதல் ஸ்ரவண விரதம் கடைப்பிடிக்க உள்ளதால், அங்கு முட்டை நுகர்வு சரிந்துள்ளது. இதனால் நாமக்கல் மண்டலத்தில் முட்டை விலையை குறைத்துள்ளனர். மூன்று நாட்களில், 40 காசு சரிந்துள்ளது குறிப்பிடத்தக்கது.நாட்டின் பிற மண்டலங்களில் முட்டை விலை(காசுகளில்) நிலவரம்: சென்னை, 610, ஐதராபாத், 510, விஜயவாடா, 540, பர்வாலா, 475, மும்பை, 570, மைசூரு, 610, பெங்களூரு, 600, கோல்கட்டா, 580, டில்லி, 505 என, நிர்ணயம் செய்யப்பட்டுள்ளது. நாமக்கல்லில் நடந்த பண்ணையாளர், வியாபாரிகள் ஒருங்கிணைப்புக்குழு கூட்டத்தில், முட்டைக்கோழி ஒரு கிலோ, 92 ரூபாய்க்கும், பல்லடத்தில் நடந்த உற்பத்தியாளர் ஒருங்கிணைப்புக்குழு கூட்டத்தில், கறிக்கோழி ஒரு கிலோ, 106 ரூபாய்க்கும் விற்பனை செய்யப்பட்டது.