மலை ரயிலில் சுற்றுலா பயணியர் அதிகரிப்பு; சிறப்பு ரயில் இயக்கப்படுகிறது

குன்னுார் : நீலகிரி மலை ரயிலில் சுற்றுலா பயணியர் கூட்டம் அதிகரித்துள்ளது. இதையடுத்த, நாளை மற்றும் நாளை மறுநாள் சிறப்பு ரயில்கள் இயக்கப்படுகின்றன.தீபாவளி பண்டிகையையொட்டி தொடர் விடுமுறை காரணமாக, நீலகிரி மாவட்டத்திற்கு வரும் சுற்றுலா பயணியர் எண்ணிக்கை அதிகரித்துள்ளது. குன்னுார் சிம்ஸ் பூங்கா, லேம்ஸ்ராக், டால்பின் நோஸ் உள்ளிட்ட சுற்றுலா மையங்களில் சுற்றுலா பயணியர் கூட்டம் அதிகரித்துள்ளது. இதே போல, மலை ரயிலிலும் சுற்றுலா பயணியர் பயணம் செய்ய ஆர்வம் காட்டுகின்றனர்.மேட்டுப்பாளையம் - ஊட்டி இடையே இயக்கப்படும் மலை ரயிலில் அனைத்து இருக்கைகளும் முன்பதிவு செய்யப்பட்டுள்ளன. ஊட்டி - குன்னுார் இடையே இயக்கப்படும், மலை ரயில்களிலும் கூட்டம் அதிகரித்துள்ளது.இந்நிலையில், தீபாவளி தொடர் விடுமுறையை ஒட்டி, நாளை மற்றும் நாளை மறுநாள் சிறப்பு மலை ரயில் இயக்கப்படுகிறது. குன்னுாரில் இருந்து ஊட்டிக்கு காலை, 8:20 மணி, ஊட்டியில் இருந்து குன்னுாருக்கு மாலை, 4:45 மணி என, இரண்டு சிறப்பு ரயில்கள் இயக்கப்படுகின்றன.ஊட்டி - கேத்தி இடையே, 'ரவுண்ட் டிரிப் ஜாய் டிரைன் எனும் சிறப்பு ரயில், காலை, 9:45 மணி; காலை, 11:35 மணி; மாலை 3:00 மணிகளில் சுற்று ரயில்களாக இயக்கப்படுகின்றன.