ராமேஸ்வரம், சென்னை வந்தே பாரத் பரமக்குடியில் நிறுத்தம் வேண்டும்: வியாபாரிகள் வலியுறுத்தல்

பரமக்குடி: பரமக்குடி வியாபாரிகள் சங்கம் ஆண்டு பொதுக் குழு கூட்டத்தில், சென்னை, ராமேஸ்வரம் வந்தே பாரத் ரயில் பரமக்குடியில் நிறுத்த வேண்டும், என தீர்மானம் நிறைவேற்றப்பட்டது. சங்க தலைவர் போஸ் தலைமை வகித்தார். இணைச்செயலாளர் ஜெயம் அந்துவான் வரவேற்றார். பொதுச்செயலாளர் மணிவண்ணன் செயல், பொருளாளர் திருநாவுக்கரசு நிதிநிலை அறிக்கை வாசித்தனர். தமிழ்நாடு உணவு பொருள் வியாபாரிகள் சங்க தலைவர் வேல்சங்கர், கவுரவ ஆலோசகர் ஜெயப்பிரகாசம், தொழிலாளர் உதவி ஆணையர்(அமலாக்கம்) மலர்விழி, ராமநாதபுரம் மாவட்ட வர்த்தக சங்க தலைவர் ஜெகதீசன், மகாதேவன் (மளிகை) வாழ்த்தினர். பரமக்குடி ரயில்வே ஸ்டேஷன் ஆண்டுக்கு 10 கோடி ரூபாய் வருமானம் ஈட்டும் நிலையில் பயன்பாடு கருதி வரவுள்ள சென்னை, ராமேஸ்வரம் வந்தே பாரத் ரயில் பரமக்குடியில் நிறுத்த ரயில்வே நிர்வாகம் நடவடிக்கை எடுக்க வேண்டும். வைகை ஆற்றில் நிலத்தடி நீரை காக்க, நாணல், கருவேல மரங்கள் மற்றும் தனியார் ஆக்கிரமிப்புகளை அகற்றி, சாக்கடை கலப்பதை தடுத்து, நீர் ஆதாரத்தை பாதுகாக்க வேண்டும். தெரு நாய்கள், பன்றிகளை கட்டுப்படுத்துவதுடன், ரோட்டில் திரியும் மாட்டு உரிமையாளர்கள் மீது நகராட்சி நடவடிக்கை வேண்டும். பல மாதமாக சேதமடைந்துள்ள போஸ்ட் ஆபீஸ் ரோட்டை சீரமைக்க வேண்டும். தமிழ்நாடு அரசு அறிவித்துள்ள உத்தரவுக்கு மாறாக நகராட்சியில் பொது மக்களுக்கு பல மடங்கு சொத்து வரி உயர்த்தப்பட்டதை ரத்து செய்ய வேண்டும், ஆகிய தீர்மானங்கள் நிறைவேற்றப்பட்டது. இணைச் செயலாளர் மணவாளன் மற்றும் நிர்வாகிகள் கலந்து கொண்டனர். கனகராஜ் நன்றி கூறினார்.