காலாண்டு விடுமுறை சிறப்பு வகுப்புக்கு தடை

சேலம் :தமிழகத்தில் ஒன்று முதல், 7ம் வகுப்பு வரை முப்பருவ கல்வி முறை; 8 முதல், பிளஸ் 2 வரை, முழு ஆண்டு கல்வி முறை செயல்படுத்தப்படுகிறது. இதன்படி, 7ம் வகுப்பு வரை, முதல் பருவ பாடம் நடத்தி முடிக்கப்பட்டு தேர்வு நடத்தப்பட்டது. 8 முதல், பிளஸ் 2 வகுப்புக்கு, கடந்த, 17 முதல், நேற்று வரை காலாண்டு தேர்வு நடத்தப்பட்டது. அனைத்து வகுப்புகளுக்கும் தேர்வுகள் நிறைவடைந்த நிலையில், அக்., 5 வரை, காலாண்டு விடுமுறை அறிவிக்கப்பட்டுள்ளது. அதேநேரம் மாவட்ட கல்வி அலுவலர்கள் மூலம், தனியார் பள்ளிகளுக்கு சுற்றறிக்கை அனுப்பப்பட்டுள்ளது. அதில் கடந்த ஆண்டு நீதிமன்ற அறிவுறுத்தலை மேற்கோள் காட்டி, விடுமுறை நாட்களில் பள்ளிகளில் சிறப்பு வகுப்புகள் நடத்தக்கூடாது என உத்தரவிடப்பட்டுள்ளது.