திருப்புத்துார் அமல அன்னை சர்ச் கொடியேற்றம்

திருப்புத்துார்: திருப்புத்துார் துாய அமல அன்னை சர்ச்சில் புதுப்பிப்பு மற்றும் புதிய திருபீடம் அர்ச்சிப்பு, ஆண்டு விழாவை முன்னிட்டு கொடியேற்றம் நடந்தது. சிவகங்கை மறை மாவட்ட ஆயர் லுார்து ஆனந்தம் தலைமை வகித்தார். பெருவிழா திருப்பலி முன்னாள் மறை மாவட்ட ஆயர் சூசைமாணிக்கம் தலைமையில் நடந்தது. திருப்புத்துார் பாதிரியார் அற்புத அரசு முன்னிலை வகித்தார். தொடர்ந்து 140 ஆண்டுகளாக நடைபெறும் ஆண்டுத் திருவிழா துவக்கத்தை முன்னிட்டு அமல அன்னை உருவம் பொறிக்கப்பட்ட கொடியானது பூஜிக்கப்பட்டு கொடிமரத்தில் கட்டப்பட்டு தூபம் காட்டப்பட்டது. தொடர்ந்து கொடியேற்றப்பட்டு, கொடியேற்றப்பாடல் பாடப்பட்டது. தொடர்ந்து விழா டிச.8 வரை நடைபெறும். இவ்விழாவில் தினசரி மாலை 6:00 மணிக்கு சர்ச்சை சுற்றி திருவுருவ பவனியுடன் ஜெபமாலையும், தொடர்ந்து நவநாள் திருப்பலியும் நடைபெறும். முன்னதாக தென்மாப்பட்டு புனித ஜான் போஸ்கோ தொடக்கப்பள்ளியில் புதிய கட்டடத்தை அர்ச்சித்து மறை மாவட்ட ஆயர் லுார்து ஆனந்தம் திறந்து வைத்தார். தாளாளர்,ஆசிரியர்கள்,மாணவர்கள்,பொதுமக்கள் பங்கேற்றனர்.