கும்பக்கரை அருவியில் குவிந்த சுற்றுலா பயணிகள்

பெரியகுளம்: கிறிஸ்துமஸ் பண்டிகை, அரையாண்டு தேர்வு விடுமுறையை முன்னிட்டு கும்பக்கரை அருவியில் ஏராளமான சுற்றுலாப் பயணிகள் குளித்து மகிழ்ந்தனர். பெரியகுளம் அருகே 8 கி.மீ., தொலைவில் கும்பக்கரை அருவி உள்ளது. கொடைக்கானல் மலைப்பகுதி வட்டக்காணல், பாம்பார்புரம் பகுதியில் பெய்யும் மழை, கும்பக்கரை நீர்ப்பிடிப்புப் பகுதியில் பெய்யும் மழையால் அருவிக்கு தண்ணீர் வருகிறது. தமிழகம் மட்டுமின்றி ஆந்திரா, கர்நாடகா மாநிலங்களில் இருந்து சபரிமலைக்கு செல்லும் ஏராளமான ஐயப்ப பக்தர்கள் ஊருக்குச் செல்லும் போது கும்பக்கரை அருவிக்கு வருகின்றனர். இதே போல் கொடைக்கானல் சென்று விட்டு ஊருக்குச் செல்வோர் கும்பக்கரை அருவிக்கு வருகின்றனர். நேற்று கிறிஸ்துமஸ் பண்டிகை, அரையாண்டு தேர்வு விடுமுறையை முன்னிட்டு ஏராளமான சுற்றுலாப் பயணிகள் கும்பக்கரை அருவியில் குளித்து விட்டுச் சென்றனர்.